ამის შესახებ განცხადებას ესტონეთის საგარეო საქმეთა სამინისტრო ავრცელებს.

რატომ არის მნიშვნელოვანი: გუშინ, 7 მარტს პარლამენტმა დაუგეგმავად განიხილა და პირველი მოსმენით მხარი დაუჭირა რუსულ კანონპროექტს — რის გასაპროტესტებლად მოქალაქეები პარლამენტთან შეიკრიბნენ.

  • დღეს დილით ესტონეთის, ლიეტუვას და ლატვიის საგარეო სამინისტროებმა თბილისში მიმდინარე მოვლენებზე გაავრცელეს ერთობლივი განცხადება.
  • ბალტიის ქვეყნები მთავრობას ხალხის მშვიდობიანი პროტესტის უფლების პატივისცემისკენ მოუწოდებდნენ.

დეტალები: საგარეოს განცხადებით, ელჩი დაიბარეს, რათა გამოეთქვა დიდი უკმაყოფილება საქართველოს პარლამენტის გადაწყვეტილებით, დაამტკიცოს კანონპროექტი უცხოური გავლენის გამჭვირვალობის შესახებ.

  • განცხადებაში ვკითხულობთ, რომ უცხოური აგენტის კანონპროექტი, რომელიც საქართველოს პარლამენტში პირველი მოსმენით მიიღეს, აჩენს სერიოზულ კითხვებს საქართველოში დემოკრატიის პერსპექტივასთან დაკავშირებით — "კანონი საქართველოს ჩქარი ევროატლანტიკურ ამბიციებთან აშკარა წინააღმდეგობაშია".
  • "ეწინააღმდეგება ევროპულ ღირებულებებსა და ევროკავშირის კანდიდატობის მოპოვებისთვის 12 საჭირო პრიორიტეტის კონტრპროდუქტიულია";
  • "კანონის იმპლემენტაცია გამოიწვევს დამოუკიდებელი მედიისა და სამოქალაქო საზოგადოების დადუმებას და საქართველოში ესტონეთის კოოპერაციული პროექტების განვითარებას გაართულებს".

გარდა ამისა, ესტონეთის საგარეო მოუწოდებს საქართველოს პარლამენტს, პასუხისმგებლობით განიხილოს ქვეყნის ნამდვილი ინტერესი და უკან წაიღოს კანონპროექტი.

  • "ასევე მთავრობას მოვუწოდებთ, პატივი სცეს ხალხის მშვიდობიანი პროტესტის უფლებას", — წერია განცხადებაში.
  • On.ge დამატებითი დეტალების გასარკვევად საქართველოს საგარეო საქმეთა სამინისტროს დაუკავშირდა — პასუხს მიღებისთანავე შემოგთავაზებთ.