პარლამენტში პრორუსული პარტიის, პატრიოტთა ალიანსის სიით შესული, ამჟამად ევროპელი სოციალისტების დეპუტატი, ფრიდონ ინჯია 2008 წლის ომზე საგამოძიებო კომისიის შექმნას ითხოვს და ხელმოწერებს აგროვებს.

რატომ არის მნიშვნელოვანი: ინჯია კრემლისტურ ნარატივს იმეორებს და ამტკიცებს, რომ ომის დაწყებას წინ სამაჩაბლოში პროვოკაციული სროლები უსწრებდა, რისი "ლოგიკური კულმინაციაც" 2008 წლის 7 აგვისტოს ღამით სააკაშვილის ბრძანებით ცხინვალის დაბომბვა და რუსეთ-საქართველოს ომის დაწყება იყო.

  • იმ ნარატივს, თითქოს ომის პროვოცირებაში წვლილი ქართულ მხარეს მიუძღვის, რუსეთი პროპაგანდისთვის წლებია იყენებს, მაგრამ არცერთი ავტორიტეტული ორგანიზაციის ანგარიში არ ადასტურებს.
  • გასული წლის ივნისში ჰააგის სასამართლომ აგვისტოს ომის საქმეზე გადაწყვეტილება მიიღო და საქართველოს ბრალეულობა არც ერთ ნაწილში არ დაუნახავს.

დეტალები: დეპუტატი ამბობს, რომ ადამიანებს, რომლებსაც "2008 წელს უმძიმესი დანაშაული აქვთ ჩადენილი" საქართველოს ომში ჩათრევას ცდილობენ და მათ დანაშაულზე პასუხი უნდა აგონ.

  • "მას შემდეგ, რაც ხელისუფლება სტრასბურგსა და ჰააგის სასამართლოებში საქმეები მოიგო, ამ თემაზე გაჩუმების მიზეზი გაურკვეველია. ისმის კითხვა, რატომ არიან ჩუმად".
  • "გაუგებარია, რატომ უნდა დავაფაროთ ან ვაფარებთ ხელს სააკაშვილის რეჟიმს მის მთავარ დანაშაულზე, რომელიც მან ქართველი სახელმწიფოსა და ხალხის წინაშე ჩაიდინა", — ამბობს ინჯია.

მდინარაძე: ქართული ოცნების დეპუტატის თქმით, მას, როგორც საქართველოს მოქალაქეს, აწუხებს კითხვა:

  • "რატომ მოხდა რომ ტალიავინის კომისიის დასკვნაში ასე დაიწერა, რეზოლუციაში ასე დაიწერა, ტალიავინის კომისიის დასკვნის ეს მოცემულობა ისტორიულ აღწერილობაში გადავიდა, როცა სტრასბურგმა აბსოლუტურად სხვა თემაზე იმსჯელა, რატომ დაუჭირეს მხარი იმას, რომ ქართველმა სამხედროებმა სამხედრო დანაშაული ჩაიდინეს — რატომ გააკეთეს ეს ყველაფერი?"
  • მდინარაძის თქმით, დაინტერესებულია, რატომ იმოქმედეს საქართველოს ინტერესების საწინააღმდეგოდ და ამის გამოძიებას მხარს "დიდი სიამოვნებით" დაუჭერს.

ოპოზიცია: საგამოძიებო კომისიის შექმნის იდეა კრიტიკულად უკვე შეფასდა. ნაციონალური მოძრაობის წევრის, ხატია დეკანოიძის განცხადებით, ეს ინიციატივა კრემლის პროპაგანდისტული გზავნილის გამეორებაა.

  • სტრატეგია აღმაშენებლის ლიდერის, გიორგი ვაშაძის თქმით, ერთადერთი მიზანი, რასაც კომისიის შექმნა ემსახურება, ჰააგაში მარცხისთვის განწირული რუსული მხარისთვის პოზიტიური არგუმენტების შექმნაა.
  • ხოლო, იაგო ხვიჩია ამბობს, რომ ევროპელმა სოციალისტებმა, როდესაც გირჩს სჭირდებოდა, საგამოძიებო კომისიის შექმნაზე უარი უთხრეს, ამიტომ, არანაირი ვალდებულება არ აქვთ, მათთვის უინტერესო კომისიას მხარი დაუჭირონ.
  • "თუ ვინმეს ვაკრიტიკებთ ომის პერიოდის მტკიცებულებების და საქმეების გაფუჭებისთვის ან ხელახლა დაწყებისთვის, ქართული ოცნება უნდა იყოს", — დასძენს ხვიჩია.

გაიგე მეტი: