შინაგან საქმეთა სამინისტრო ამტკიცებს, რომ 4 ივნისს, ზაჰესში Tbilisi Jem Fest 2016-ის სასულიერო პირების მიერ ჩაშლის დროს სისხლის სამართლებრივი დანაშაულის ნიშნები არ გამოკვეთილა. "პოლიციამ პირნათლად შეასრულა მასზე დაკისრებული მოვალეობა, ხოლო ფესტივალი მხოლოდ შუქის ჩაქრობის გამო ჩაიშალა", – ასე უპასუხეს შინაგან საქმეთა სამინისტროში On.ge-ს შეკითხვას იმასთან დაკავშირებით, რატომ არაფერი მოიმოქმედა პოლიციამ იმისთვის, რომ გუშინ ზაჰესში ფესტივალი არ ჩაშლილიყო.

ჩვენ ასევე დავუკავშირდით Energo-pro Georgia-ს იმისთვის, რომ გაგვერკვია, რატომ ჩაქრა ფესტივალზე შუქი. როგორც კომპანიის ოპერატორმა ჩვენთან საუბარში განაცხადა, გუშინ საღამოს მათი მხრიდან ელექტროენერგიის მიწოდებასთან დაკავშირებით არანაირი შეფერხება არ ყოფილა.

მან განმარტა, რომ საბაჟო ტერმინალ ზაჰეს 2007-ის ტრანსფორმატორს ელექტროენერგია სრულფასოვნად მიეწოდებოდა, დენი კი მხოლოდ ადგილობრივად შეიძლებოდა გაეთიშათ, რაშიც ენერგო პრო ჯორჯიას არანაირი მონაწილეობა არ მიუღია.

ზაჰესი 2007-ის თანამშრომელმა, ზაზა გუგავამ კი განგვიცხადა, რომ ფესტივალის დროს დენი შეგნებულად არავის გამოუთიშავს და ელექტროენერგიის გათიშვა, სავარაუდოდ, გამოიწვია იმან, რომ კაბელები, რომლებიც მიწის ზედაპირზე იყო, დაზიანდა:

"სავარაუდოდ მანქანამ გადაუარა და დააზიანა".

ჯერჯერობით უცნობია, ჩატარდება თუ არა, ან თუ ჩატარდება, სად და როდის გაიმართება გუშინ ჩაშლილი კონცერტი. ჩვენ შევეცადეთ გაგვერკვია, რას გეგმავენ ფესტივალის ორგანიზატორები ამასთან დაკავშირებით, თუმცა მათგან პასუხი ჯერ არ მიგვიღია. ასევე პასუხგაუცემელია ფესტივალის ფეისბუქ გვერდზე დაინტერესებული ადამიანების შეკითხვებიც.

გუშინ, 4 ივნისს, ზაჰესში როკ მუსიკის ორდღიანი ფესტივალი Tbilisi JAM Fest 2016 დაწყებიდან მალევე მართლმადიდებელმა სასულიერო პირებმა მრევლთან ერთად ჩაშალეს.

ფესტივალზე მყოფმა ერთ–ერთმა პირმა, ცვატა ბერძენიშვილმა On.ge-ს განუცხადა, რომ სასულიერო პირები და მათთან ერთად მყოფი მოქალაქეები, კონცერტის შეწყვეტას ითხოვდნენ, მათი მთავარი არგუმენტი კი ის იყო, რომ "ახლოს სასაფლაოა" და "მუსიკის ხმა ეკლესიამდე ისმის".

ფესტივალზე დამსწრე ერთ-ერთმა პირმა, ედიტა ბადასიანმა კი თავის Facebook გვერდზე დაწერა, რომ ფესტივალის ტერიტორიაზე ჩაქრა შუქი.

მომხდარით ასევე უკმაყოფილება გამოხატა მეტალ ბენდმა JINJER-მაც, რომელიც გუშინ უნდა წარმდგარიყო მსმენელის წინაშე.