სტატია, რომლის მიზანი მკითხველის შეცდომაში შეყვანაა, RIA-ზე დღეს გამოქვეყნდა.

რატომ არის მნიშნველოვანი: RIA რუსეთის ერთ-ერთი ყველაზე გავლენიანი პროპაგანდისტული მედიაა, რომელიც მუდმივად ავრცელებს დეზინფორმაციას და კრემლის ნარატივებს აჟღერებს.

• გამოცემა მმართველი გუნდის ლიდერების განცხადებებს, რომელსაც ადგილობრივი მედია და არასამთავრობო სექტორი პროპურუსულად და ანტიდასავლურად ვაფასებთ, იმის დასამტკიცებლად იყენებს, თითქოს ქვეყანა მზადაა, ევროპაზე უარი თქვას.
• მასალაში არგუმენტად გამოყენებულია ისიც, რომ ბოლო პერდიოში ქართული ოცნების ლიდერების განცხადებებმა არაერთხელ "დაიმსახურა" რუსეთის მაღალჩინოსნების მოწონება.
• ეს სტატია გამოქვეყნდა საბჭოთა ოკუპაციის 102-ე წლისთავის მეორე დღეს, მას შემდეგ რაც ირაკლი ღარიბაშვილმა ანექსიაზე პოსტში რუსეთი არ ახსენა და კომენტარებში რუსეთის დაწერის გამო მთავრობის გვერდზე მოქალაქეები დააბლოკინა.
• მედია და არასამთავრობო სექტორი დიდი ხანია ვსაუბრობთ იმაზეც, რომ მმართველი გუნდის განცხადებები რუსულ პროპაგანდის მანქანაზე ასხამს წყალს, რაც მსგავსი მასალებით დასტურდება.

დეტალები: ავტორი წერს, თითქოს ოფიციალურმა თბილისმა განაცხადა, რომ უარს იტყვის ევროკავშირში გაწევრიანებაზე, თუ ევროპელები გააგრძელებენ ქვეყნის შიდა საქმეებში ჩარევას.

• "მიზეზი ექსპრეზიდენტ მიხეილ სააკაშვილის გათავისუფლების მორიგი მოწოდებაა. გარდა ამისა, დასავლეთი უკმაყოფილოა საქართველოს სურვილით, მიიღოს კანონი უცხოური აგენტების შესახებ", — ვკითხულობთ სტატიის შესავალში.
• "მშვიდობით ევროპა" — ამ ქვესათაურში განხილულია შეფასებები ექსპრეზიდენტის ჯანმრთელობაზე და აღნიშნულია, რომ თბილისი არ ჩქარობს ევროპელი პარტნიორების მიმართვის გათვალისწინებას.
• აქვე იმის დასამტკიცებლად, რომ საქართველო ევროპას არ უჯერებს, გამოყენებულია კახა კალაძის ციტატა: "არ მოგვცემენ სტატუსს და თავისთვის დაიტოვონ".
• ამის შემდეგ ისინი განიხილავენ ანტიდასავლური მოძრაობის ხალხის ძალის კანონპროექტს.
• სტატიაში იმეორებენ ავტორების განცხადებას, თითქოს ის ამერიკული კანონის მსგავსია — რუსულ კანონს კი მხოლოდ ოპოზიციის და პარტნიორების კრიტიკულ შეფასებაზე საუბრისას ახსენებენ და არაფერს წერენ იმაზე, როგორ იყენებენ რუსეთში მის ანალოგს.

ღარიბაშვილის სიტყვებს მეორე ფრონტის შესახებ RIA უყურადღებოდ არ ტოვებს და წერს, რომ პრემიერი დარწმუნებულია, ევროპის პრეტენზიები ამას უკავშირდება.

• აქვე ახსენებენ პრემიერმინისტრის მუდმივად გამეორებად ფრაზას ეკონომიკურ ზრდაზე და წერენ იმასაც, რომ გასულ წელს რუსეთი იყო საქართველოს მთავარი სავაჭრო პარტნიორი — ამ ფორმით, მანიპულაციურად ცდილობენ წარმოაჩინონ, თითქოს ქვეყნის ეკონომიკური ზრდა რუსეთის დამსახურებაა.
• სტატიაში აღნიშნულია ისიც, რომ რუსეთის საგარეო საქმეთა მინისტრი სერგეი ლავროვი თბილისის პოზიციას გაბედულად მიიჩნევს.
• შეგახსენებთ, რომ ევროკავშირის ელჩმა ლავროვის მიერ მმართველი გუნდის ქება შეაფასა, როგორც საქართველოსა და დასავლეთს შორის უთანხმოების ჩამოგდების კლასიკური გზა და პროპაგანდის მაგალითი.
• ხოლო უკრაინის საგარეომ ლავროვისა და კობახიძის განცხადებებს თბილისსა და მოსკოვს შორის რევერანსების გაცვლა უწოდა.

გარდა ამისა, სტატიას თან ერთვის ამავე გამოცემის კიდევ ერთი მასალა "დასავლეთი რუსეთის წინააღმდეგ მეორე ფრონტს ამზადებს", რომელშიც განხილულია ირაკლი კობახიძის განცხადება კიევის მხრიდან მეორე ფრონტის გახსნის სურვილზე და წერია, რომ საქართველოს ხელისუფლებას არ სურს მოსკოვთან მტრობა.

• ევროპაზე სტატიის დასასრულს კი მოყვანილი ყავთ რუსი და ქართველი პოლიტოლოგების შეფასებები, რომლებიც აძლიერებენ კრემლის ნარატივს.
• მაგალითად, შოთა აფხაიძე, რომელიც აგენტებზე ხალხის ძალის კანონპროექტის მხარდამჭერად არის მოხსენიებული, ავრცელებს ანტიდასავლურ პროპაგანდას, თითქოს აშშ-ს და ევროკავშირს სურს ქვეყნიდან მაქსიმალური სარგებელი გამოწურონ, მაგრამ სანაცვლოდ არაფერს სთავაზობენ.

სინამდვილეში წლების განმავლობაში საქართველოს პარტნიროებმა ქვეყნის ეკონომიკური წინსვლისთვის არაერთი პროექტი დააფინანსეს და დაეხმარენ სახელმწიფო ინსტიტუტების გაძლიერებაში. გარდა ამისა, ისინი ეხმარებიან ადგილობრივ არასამთავრობო სექტორსაც, ადამიანის უფლებების დაცვის უზრუნველსაყოფად.

• რაც შეეხება ევროპული კურსის ცვლილებას, ხელისუფლების პრორუსული და ანტიდასავლური განცხადებების მიუხედავად, ქვეყნის აბსოლუტური უმრავლესობა დასავლური კურსის მხარდამჭერია.
• მაგალითად, CRRC-ის ბოლო კვლევის თანახმად, საქართველოს მოქალაქეები ძლიერ პროდასავლურ მისწრაფებებს ინარჩუნებენ.
• NDI-ის კვლევის მიხედვით, ევროკავშირისა და NATO-ში გაწევრიანების მომხრეთა რიცხვი გაიზარდა.