მედიების ცნობით, დაკავებულთა შორის არიან ისინი, ვინც უკრაინაში შეჭრას გმობდნენ, მხარს მშვიდობას უჭერდნენ ან მდუმარედ აპროტესტებდნენ რუსულ აგრესიას.

რატომ არის მნიშვნელოვანი: დღეს მსოფლიოს მასშტაბით უკრაინის მხარდასაჭერი აქციები გაიმართა.

  • მოქალაქეებმა ანტისაომარი ბანერები რუსეთის სხვადასხვა ქალაქებშიც განათავსეს, ოკუპანტ ქვეყანაში დემონსტრაციები საპოლიციო კონტროლის ფონზე მიმდინარეობდა.
  • წარუმატებელი ომის ფონზე, კრემლი მოსახლეობაში "პატრიოტული" და საომარი განწყობების გასაცოცხლებლად არაერთ გზას მიმართავს, მათ შორისაა — ტერორი და აბსურდული კანონების მიღება.
  • სრულმასშტაბიანი ომის დაწყებისას, რუსეთში უამრავმა ადამიანმა გააპროტესტა უკრაინაში შეჭრა, რის შედეგადაც ათასობით ადამიანი დააკავეს.

დეტალები: საპროტესტო აქციები უკრაინის ომის წლისთავზე რუსეთის 14 ქალაქში გაიმართა.

  • სულ მცირე 11 ადამიანი დააკავეს ეკატერინბურგში, რომელიც სიდიდით რუსეთის მეოთხე ქალაქია.
  • SOTA-ს ცნობით, მინიმუმ 7 ადამიანია დაკავებული სანქტ-პეტერბურგში, უკრაინელი მწერლის, ტარას შევჩენკოს ძეგლთან ყვავილების მიტანისთვის. ადგილობრივი პოლიციის განმარტებით, დაკავებულებმა კორონავირუსის შეზღუდვები დაარღვიეს.
  • მოსკოვში დააკავეს პირი, რომელიც უკრაინელი მწერლის, ლეისა უკრაინკას ძეგლთან მივიდა.
  • Meduza-ს ცნობით, ქალაქ კოროლიოვში დააკავეს ქალი, რომელსაც ეჭირა აბრა, წარწერით — "მე მხარს ვუჭერ მშვიდობას".
  • ვიკსას საკრებულოს წევრი დააკავეს შემდეგი წარწერის გამო — "მშვიდობა უკრაინას. ჯარისკაცები წადით სახლში".