უკრაინის მოქალაქეებისთვის შენგენის ზონაში უვიზო მიმოსვლა ამოქმედდა. მათ ოფიციალურად 11 ივნისიდან შეუძლიათ შენგენის ზონის ქვეყნების საზღვრის უვიზოდ გადაკვეთა.

შაბათს საღამოს, ათასობით უკრაინელი შეიკრიბა კიევში ევრომაიდანზე და კონცერტით აღნიშნა უვიზო მიმოსვლის დაწყება.

კონცერტს დაესწრო პრეზიდენტი პეტრო პოროშენკო, რომელმაც განაცხადა, რომ უკრაინის საბოლოო და შეუქცევადი გაყრა მოსკოვთან, სავიზო ლიბერალიზაციამ დააგვირგვინა. ის რუსი პოეტის, მიხეილ ლერმონტოვის ლექსით დაემშვიდობა რუსეთს.

"დღეს, ყველა უკრაინელს შეუძლია, რომ ბრატისლავაში ფანტასტიური ყავა დალიოს, ან დაბალბიუჯეტიანი ავიახაზებით გაემგზავროს ვარშავაში, ან კიდევ წავიდეს ვენის ოპერაში", - უთხრა პოროშენკომ ევრომაიდანზე შეკრებილებს.

ევროკავშირმა და კიევმა სავიზო ლიბერალიზაციაზე მოლაპარაკებები 2008 წელს დაიწყეს. 2015 წლის ბოლოს, ევროკომისიამ გამოაქვეყნა დასკვნა, რომ უკრაინამ პროგრესი განიცადა და ყველა კრიტერიუმი დააკმაყოფილა, ვიზალიბერალიზაციისთვის.

უკრაინისთვის სავიზო ლიბერალიზაცია გულისხმობს მოკლევადიან ვიზიტებს, ანუ 90 დღეს შენგენის ზონაში, ნებისმიერი 180 დღის განმავლობაში.