LGBTQ აქტივისტი, კატო ჯორჯეული On.ge-სთან ამბობს, რომ გუშინ, 16 თებერვალს მასსა და მასთან ერთად მყოფ კიდევ ერთ აქტივისტს, რომელიც არასრულწლოვანია, ორი, დაახლოებით, 25-26 წლის პირი აედევნა და დაემუქრა.

რატომ არის მნიშვნელოვანი: ეს პირველი შემთხვევა არ არის, როდესაც ჰომოფობიურ ნიადაგზე თემის წევრებს თავს ესხმიან.

  • საქართველოში ლგბტ ადამიანები ორიენტაციისა თუ გენდერული იდენტობის გამო არაერთ პრობლემას აწყდებიან. მათზე ძალადობენ ფიზიკურად, ფსიქოლოგიურად, ემუქრებიან, ხელს უშლიან დასაქმებაში, ყოველდღიურად ხდება დისკრიმინაცია.

დეტალები: აქტივისტი ამბობს, რომ თავდაპირველად უცნობი პირების აგრესიულ და მუქარის შემცველ საუბარს საკუთარ თავს თავს ვერ უკავშირებდნენ.

  • "ამათი ლაპარაკი მესმოდა, ერთი ეუბნებოდა მეორეს, ის ტიპი დამაჭერინა სადმეო, ჩამაგდებინა ხელშიო, რომ დავლეწო და გადავამტვრიო მუხლებშიო, ავკუწოო, იგინებოდნენ".
  • ჯორჯეულის თქმით, მეორე აქტივისტი, სავარაუდოდ, სოციალური ქსელიდან იცნეს, რადგან მიმართავდნენ სიტყვებით — "შენ ის Tik-Tok-ერი არ ხარ, გაჩვენებ ვინც ხარო".
  • აქტივისტი ამბობს, რომ როდესაც მუქარა რეალურად აღიქვეს, ავტობუსიდან ჩამოვიდნენ, დაახლოებით 15 წუთის განმავლობაში ერთ-ერთ კორპუსს შეაფარეს თავი, შემდეგ კი პოლიციაც გამოიძახეს.
  • უწყებაში On.ge-ს განუცხადეს, რომ გამოძიება სისხლის სამართლის კოდექსის 151-ე მუხლის მე-2 ნაწილით დაიწყო, რაც არასრულწლოვნის მიმართ მუქარას გულისხმობს.