სიმონ დადიანის საფრანგეთში მცხოვრები ნათესავები საქართველოს კულტურის მინისტრს ღია წერილით მიმართავენ.

რატომ არის მნიშვნელოვანი: წერილის ავტორები აღნიშნავენ, რომ ლია და მიხეილ ვოდემ 2017 წელს საქართველოს თავის საკუთრებაში არსებული სიმონ დადიანის 22 ნამუშევარი უანგაროდ გადასცა.

  • ორბელიანის სასახლიდან 5 ტილოს გატანას ლია და მიხეილ დოდე სპეციალურ ოპერაციას უწოდებს, რომელიც მათთვის რთულად დასაჯერებელია, რადგან სწორედ ორბელიანების სასახლე ესახებათ ადგილად, სადაც მსურველები ნამუშევრების დათვალიერებას შეძლებდნენ.
  • ნამუშევრები პრეზიდენტის სასახლიდან მის მიერ გაკეთებული კრიტიკული განცხადების შემდეგ გაიტანეს, როცა მან სოლიდარობა გამოხატა მხატვარ სანდრო სულაბერიძის მიმართ, ხოლო საქართველოს მთავრობა საბჭოთა ხელისუფლებას შეადარა.

დეტალები: ლია და მიხეილ ვოდეს ცნობით, ნახატების საქართველოსთვის გადაცემა თავად ხელოვანის სურვილი იყო.

  • "მსურს ჩემი ნამუშევრები გადაეცეს საქართველოს, როდესაც ის იქნება თავისუფალი და დამოუკიდებელი, რათა ისინი ყველამ გაიცნოს ჩემს სამშობლოში, რომელიც 5 წლის ასაკში დავტოვე", — ამბობდა სიმონ დადიანი.
  • ამ სურვილის აღსრულებაში ხელოვანის ნათესავებს მათი ბავშვობის მეგობარი, სალომე ზურაბიშვილი დაეხმარა, რომელიც იმ დროს საქართველოს პარლამენტის წევრი იყო.
  • "საქართველომ პასუხისმგებლობა აიღო, რომ ამ ნამუშევრებს გააცნობდა საზოგადოებას. სად, თუ არა ორბელიანის სასახლეში, შეიძლება ამ ტილოების დათვალიერება", — ნათქვამია წერილში.
  • მათი შეფასებით, საქართველოს დიდი შრომა არ გაუწევია ამ ტილოების პოპულარიზაციისთვის.
  • "ქალბატონო მინისტრო, ხელოვნებას არ უყვარს ზეწოლა . დართეთ ნება, რომ ხალხმა იხილოს ეს ნამუშევრები და შესრულდეს საქართველოს სახელმწიფოს მხრიდან 2017 წელს აღებული ვალდებულება", — ნათქვამია წერილში.

სვიმონ დადიანი აშშ-ში მოღვაწე ქართველი მხატვარი, გრაფიკოსი და მოქანდაკე იყო.

  • მან 5 წლის ასაკში, 1921 წელს ოჯახთან ერთად საქართველო დატოვა.
  • თავდაპირველად პარიზში გაემგზავრა, შემდეგ კი აშშ-ში გააგრძელა ცხოვრება და მოღვაწეობა.
  • მისი ნამუშევრები ინახება აშშ-სა და საფრანგეთში, როგორც სახელოვნებო სივრცეებში, ასევე კერძო კოლექციებში.
  • 2017 წელს სვიმონ დადიანის შემოქმედების ნაწილი მისმა მემკვიდრეებმა საჩუქრად საქართველოს ხელოვნების სასახლეს გადასცეს.
  • მხატვარი 1974 წელს სან-ფრანცისკოში, ორმოცდაჩვიდმეტი წლის ასაკში გარდაიცვალა.