დღეს უკრაინის პრეზიდენტი ბრიუსელს ეწვია, სადაც ევროპარლამენტში სიტყვით გამოვიდა.

რატომ არის მნიშვნელოვანი: ეს ზელენსკის მეორე საგარეო ვიზიტია საზღვარგარეთ, მას შემდეგ რაც რუსეთმა უკრაინაში სრულმასშტაბიანი შეჭრა დაიწყო.

  • უკრაინის პრეზიდენტი უკვე შეხვდა ბრიტანეთის პრემიერმინისტრს და მონარქს, გერმანიის კანცლერსა და საფრანგეთის პრეზიდენტს.
  • ზელენსკი მოუწოდებს პარტნიორებს გაზარდონ უკრაინის სამხედრო და ფინანსური მხარდაჭერა და გადასცენ მათ მოიერიშე თვითმფრინავები.

დეტალები: უკრაინის პრეზიდენტი ტრიბუნაზე ევროპარლამენტის პრეზიდენტმა, რობერტა მეცოლამ მიიწვია.

  • "თქვენ არ გჭირდებათ აქ იმის მტკიცება, რა მნიშვნელოვანია უკრაინის მხარდაჭერა, თქვენი 10 პუნქტიანი გეგმის შესრულება და ნამდვილი მშვიდობის მიღწევა", — მიმართა მან ვოლოდიმირ ზელენსკის.
  • ზელენსკიმ შეკრებილ ლიდერებს მადლობა გადაუხადა ომის დაწყების დღიდან პრინციპული და უწყვეტი მხარდაჭერისთვის და განაცხადა, რომ აფასებს იმას, რასაც თანამედროვე და მშვიდობიანი ევროპა აძლევს მსოფლიოს.
  • უკრაინის პრეზიდენტის შეფასებით, რუსეთი არამარტო უკრაინას ებრძვის, არამედ ებრძვის ევროპული ცხოვრების წესს.
  • "ჩვენ ამას არ დავუშვებთ", — თქვა მან და დასძინა, რომ პუტინი არის დიქტატორი, რომელიც თავისი დიქტატორული რეჟიმის მიზნების მისაღწევად საბჭოთა იარაღს იყენებს.
  • "რუსულ რეჟიმს არა მარტო ეჯავრება სოციალური სამართლიანობა და განსხვავებულობა, ისინი ინვესტიციას აკეთებენ ქსენოფობიაში და ცდილობენ ეს ნორმალიზებული გახადონ ჩვენს კონტინენტზე. ცდილობენ, რომ 20-ე საუკუნის 30-40-ანი წლების არაჰუმანური რეალობა დღევანდელ რეალობად აქციონ. ამაზე ევროპის პასუხია — არა", — განაცხადა უკრაინის პრეზიდენტმა.

ზელენსკის შეფასებით, ევროპის ბედი არასდროს ყოფილა მხოლოდ პოლიტიკოსების ხელში და ყველას შეუძლია გავლენა იქონიოს უკრაინის საერთო გამარჯვებაზე.

  • "მადლობა ყველა თქვენგანს, ყველა ქალაქსა თუ სოფელში, ვინც ამ ისტორიულ ბრძოლაში მხარს უკრაინას უჭერთ", — განაცხადა მან.

  • მისი შეფასებით, მშვიდობა და უსაფრთხოება გარანტირებული არ იქნება, თუ მსოფლიო არ დაძლევს ანტიევროპულ ძალას, რომელიც ევროპა მოიპაროს.

  • ზელენსკიმ ევროპის ლიდერებს მოუწოდა, დარჩნენ ერთგულები თავიანთი კურსის მიმართ.
  • უკრაინის პრეზიდენტმა აღნიშნა, რომ უკრაინამ და ევროკავშირმა თავიანთი ძალა პრინციპული მიდგომებით აშკარა გახადეს და ისინი თანასწორნი არიან.
  • "უკრაინა იქნება ევროკავშირის წევრი", — დასძინა მან, გამოსვლის ბოლოს კი დამსწრეები უკრაინაში მიიწვია.