თბილისში, პარლამენტის შენობის მიმდებარედ, სტუდენტურმა მოძრაობა აუდიტორია 115-მა 8 ივნისს დაკავებული რეპერების მხარდასაჭერი აქცია გამართა.

"საქართველოში იცვლებიან მთავრობები, მაგრამ მკაცრი პოლიციური რეჟიმი უცვლელი რჩება. ქვეყანაში,რომელის მოსახლეობის უმრავლესობა სიღატაკეში ცხოვრობს და არ გააჩნია ღირსეული სამსახური, წესრიგის დამყარების ერთადერთი გზა არის ტოტალური პოლიციური კონტროლი.

ამ პირობებში ყველა მთავრობა პოლიციას ანიჭებს განსაკუთრებულ უფლებებს გააკონტროლოს თითოეული მოქალაქე. ბოლო ათწლეულების მანძილზე პოლიციურმა რეჟიმმა უამრავ ადამიანს დაუნგრია ცხოვრება", - აცხადებს აუდიტორია 115. სტუდენტური მოძრაობის თქმით, გასულ წელს დემურ სტურუას თვითმკვლელობის საქმე და ამ საქმეზე ბრალდებული პოლიციელის გამართლება ეს ფაქტი უნდა ყოფილიყო ბოლო წვეთი, რაც ასე არ მოხდა და პოლიციურმა რეჟიმმა ამით ისარგებლა.

ფოტო: მაკო ჯაბუა / On.ge

"ამ ყველაფრის პარალელურად გუშინ პოლიციამ დააკავა ორი ახალგაზრდა, გიორგი ქებურია და მიშკა მგალობლიშვილი, რომელსაც ჩაუდეს ნარკოტიკი და ამ ადამიანებს 20 წლამდე პატიმრობა ემუქრებათ.

პოლიციის ამგვარი მოქმედების მიზეზი იყო ორი ახალგაზრდის კლიპი,რომელშიც გაშარჟებულია პატრულის თანამშრომელი. დღეს საქართველოს მოქალაქეების წინააღმდეგ მუშაობს რეპრესიული მანქანა,რომლისთვისაც არაფრად ღირს ადამიანის სიცოცხლე და თავისუფლება.

აქ და ახლა ჩვენ უნდა დავიწყოთ ბრძოლა იმ ადამიანების გადასარჩენად ვისაც წაართვეს თავისუფლება და მათთვის, ვისაც პოლიციური რეჟიმი უნგრევს მომავალს. ჩვენ უნდა დავამტკიცოთ, რომ სხვანაირად ცხოვრება შეიძლება", - აცხადებს აუდიტორია 115.

Birja Mafia-ს წევრებს, გიური ქებურიასა და მიშკა მგალობლიშვილს თბილისის საქალაქო სასამართლომ დღეს აღკვეთის ღონისძიებად პატიმრობა შეუფარდა. მათ სამართალდამცავები დიდი ოდენობით ნარკოტიკული საშუალება MDMA-ს შეძენა-შენახვას ედავებიან. რეპერების თქმით, მათ ნარკოტიკი ჩაუდეს და რეალურად, მათზე შური იმ კლიპის გამო იძიეს, სადაც პოლიციელი გააშარჟეს.