შედეგი ფეხბურთის ფედერაციის XXXIII საარჩევნო ყრილობაზე გამოცხადდა.

რატომ არის მნიშვნელოვანი: ქართული ოცნების დეპუტატი უკვე მესამედ გახდა პრეზიდენტი და მეორედ მონაწილეობდა ერთკანდიდატიან არჩევნებში.

  • პირველად კობიაშვილი პრეზიდენტად 2015 წელს აირჩიეს, როცა არჩევნებში სამი კანდიდატი მონაწილეობდა.
  • მეორედ, 2019 წელს უკონკურენტოდ — მაშინ კობიაშვილმა თქვა, რომ უმჯობესი იქნებოდა პროცესში სხვა პირებიც ჩართულიყვნენ.
  • ახლა ისევ ერთადერთი კანდიდატი კობიაშვილი ისევ 4 წლის ვადით აირჩიეს.

დეტალები: კობიაშვილს რომ გაემარჯვა, ხმის უფლების მქონე დელეგატთა 50%-ზე მეტის ხმა იყო საჭირო.

  • "ფარული კენჭისყრის შედეგად ლევან კობიაშვილმა მიიღო 28 ხმა, ანუ ყველა დელეგატმა ხმა მისცა ლევან კობიაშვილს", — განაცხადა ფედერაციის წარმომადგენელმა, რასაც აუდიტორია ტაშით შეხვდა.

რა თქვა კობიაშვილმა: კენჭისყრამდე მას გამოსვლის დრო ჰქონდა, რა დროსაც ამტკიცებდა, თითქოს მისთვის არ არის კომფორტი, რომ ერთადერთი კანდიდატია.

  • "ბოლო დღეებში მეკითხებოდნენ ხოლმე, რატომ ხართ მარტო. რა თქმა უნდა, ჩემი პასუხი იყო ის, რასაც 4 წლის წინაც ვიძახდი — ჩემთვის ეს კომფორტი არ არის. მეც სიამოვნებით გამიხარდებოდა და ვისურვებდი, რომ დღეს ყოფილიყო აქ ადამიანი, ან ადამიანები, რომლებსაც ასევე მოუსმენდით, ვინაიდან ჯანსაღი გარემო, ჯანსაღი კრიტიკა ყოველთვის არის მნიშვნელოვანი. ჩემთვის არ ყოფილა კომფორტი არც გასული 4 წლის განმავლობაში, რადგან წინაზეც მარტო ვიყავი",— განაცხადა კობიაშვილმა.
  • "მე არ მაქვს იმაზე პასუხი, რატომ ვარ მე დღეს აქ მარტო. თუმცა, მე მაქვს პასუხი იმაზე, რატომ ვართ ჩვენ და რატომ ვარ მე. ყოველთვის, მოედნის გარეთ და მოედანზეც პასუხი არის მარტივი — ეს არის კონკრეტული გაკეთებული საქმეები და შედეგები", — აღნიშნა მან.