ინფორმაციას უკრაინის ოფიციალური პირები და ადგილობრივი მედიები ავრცელებენ.

რატომ არის მნიშვნელოვანი: რუსეთმა არაერთხელ მიიტანა ავიაიერიში მშვიდობიან მოსახლეობასა და ენერგოინფრასტრუქტურაზე.

  • თუმცა ბოლო კვირების განმავლობაში ოკუპანტების შეტევებს მასობრივი სახე არ ჰქონია.
  • გუშინ, მას შემდეგ, რაც ცნობილი გახდა, რომ უკრაინა გერმანიისგან — ლეოპარდებს, აშშ-სგან კი აბრამსის ტიპის ტანკებს მიიღებს, მორიგი შეტევა დაიწყო, მათ შორის, ირანული დრონებით.

დეტალები: უკრაინის შეიარაღებული ძალების მთავარსარდლის, ვალერი ზალუჟნის განცხადებით, რუსეთმა უკრაინის მიმართულებით 55 რაკეტა გაუშვა, რომელთაგან 47 ჩამოაგდეს.

  • ოკუპანტებმა რაკეტები ისროლეს თვითმფრინავებიდან, ასევე, შავ ზღვაში განთავსებული ხომალდებიდან.

კიევის ოლქში რუსული რაკეტის ნაწილის დაცემას 1 ადამიანი ემსხვერპლა.

  • ქალაქის მერის, ვიტალი კლიჩკოს ინფორმაციით, დაშავდა ორი მშვიდობიანი მოქალაქე, რომლებიც საავადმყოფოში გადაიყვანეს.
  • კიევის რეგიონული სამხედრო ადმინისტრაციის განცხადებით, რუსულმა ჯარებმა დაბომბეს ენერგოობიექტები.
  • წინასწარი ინფორმაციით, დაზიანდა სამოქალაქო ინფრასტრუქტურა, საცხოვრებელი შენობები და მშვიდობიანი მოსახლეობის ავტომობილები.
  • უკრაინული მედია იუწყება, რომ რუსეთმა კიევის მისამართით 15 საკრუიზო რაკეტა ისროლა.

ლუგანსკის ოლქში ოკუპანტებმა მასობრივი სარაკეტო დარტყმები განახორციელეს.

  • საჰაერო თავდასხმამ ცეცხლი გააჩინა ვულჰედარსა და ავდიივკაში.
  • წარუმატებელი აღმოჩნდა რუსეთის შეტევა ლიმანსკის მიმართულებით — უკრაინელმა მებრძოლებმა ყველა შეტევა მოიგერიეს.

  • მტერმა დაბომბა უკრაინელი სამხედროების პოზიციები მაკეევკაში, პლოსჩანკაში, ჩერვონოპოპოვკასა და ნევსკის რაიონებში.

დონეცკის ოლქში სარაკეტო თავდასხმამ მშვიდობიანი მოქალაქის სახლი გაანადგურა.

  • დაღუპულთა და დაშავებულთა შესახებ ინფორმაცია არ გავრცელებულა.

ოდესაში მოსახლეობის ნაწილი წყლისა და ელექტროენერგიის გარეშეა დარჩენილი.

  • ოდესის რეგიონული სამხედრო ადმინისტრაციის ხელმძღვანელის, იური კრუკის ინფორმაციით, მტერმა კრიტიკული ინფრასტრუქტურის ორი ობიექტი დააზიანა.
  • მანვე ოდესის მცხოვრებლებს თავშესაფრებში დარჩენისკენ მოუწოდა.

ვინიციის ოლქში საჰაერო თავდასხმას მსხვერპლი არ მოჰყოლია.

  • რეგიონული სამხედრო ადმინისტრაციის თავმჯდომარის ინფორმაციით, შესაბამისი ჯგუფები აფეთქების ადგილზე მუშაობენ.