თავად ანდრეი კასიანოვმა შეხვედრა კომენტარის გარეშე დატოვა.

რატომ არის მნიშვნელოვანი: 25 იანვარს, საგარეო საქმეთა სამინისტროში უკრაინის ელჩი, ანდრეი კასიანოვი საქართველოდან უკრაინის მოქალაქეთა შესაძლო ევაკუაციაზე გაკეთებული განცხადების გამო ახსნა-განმარტებებისთვის დაიბარეს.

  • მანამდე, 24 იანვარს, ევროპეისკა პრავდასთან ინტერვიუში კასიანოვმა განაცხადა, რომ გამორიცხული არ არის საქართველოდან მათი მოქალაქეების ევაკუაცია დაიწყონ, თუ მათ საფრთხე დაემუქრებათ საქართველოსა და რუსეთს შორის პირდაპირი ფრენების აღდგენისა და ოკუპანტი ქვეყნის მოქალაქეების მასობრივი შემოდინების გამო.
  • ელჩი ხაზს უსვამს, რომ ეს მხოლოდ რეალური საფრთხის შემთხვევაში მოხდება.
  • ამავე ინტერვიუში კასიანოვი ამბობს, რომ საქართველოს შემხვედრი ქმედებები რუსეთთან ძირს უთხრის ორი ქვეყნის თანამშრომლობას.

დეტალები: საგარეოს განცხადებით, უკრაინის ელჩი საგარეო საქმეთა მინისტრის პირველ მოადგილეს, ლაშა დარსალიას შეხვდა.

  • მათივე თქმით, ოფიციალური კიევი მადლიერია საქართველოს მხრიდან გაწეული დახმარებისთვის და ვერ ხედავს საფრთხეს საქართველოში მყოფი უკრაინის მოქალაქეებისთვის.
  • "როგორც უკრაინის დროებით რწმუნებულთან შეხვედრაზე აღინიშნა, მსგავსი ტიპის უსაფუძვლო განცხადებები ხელს არ უწყობს ორი ქვეყნის მეგობრულ ურთიერთობებს. გამოითქვა იმედი რომ მხარეები მიმართავენ ძალისხმევას ურთიერთობის შემდგომი განვითარებისკენ", — ნათქვამია განცხადებაში.