ამის შესახებ რუსული კრიტიკული და პროპაგანდისტული მედიები წერენ.

რატომ არის მნიშვნელოვანი: ქართული წარმოშობის რუსეთში მოღვაწე მომღერალი, რუსეთის სახალხო არტისტი ვალერი მელაძე ესტრადის იმ ცნობილ სახეებს შორის იყო რომლებმაც უკრაინაში ომი დაგმეს.

  • 24 თებერვალს მან ვიდეომიმართვა გაავრცელა, რომელშიც საომარი მოქმედებების შეწყვეტას და მოლაპარაკების მაგიდასთან დაჯდომას ითხოვდა.
  • მელაძეს რუსეთის დანაშაულზე არ უსაუბრია და სანაცვლოდ თქვა, რომ მომხდარს ისტორია ოდესმე განსჯის და ყველაფერს თავის ადგილზე დააყენებს.

რა მოხდა: 2 იანვარს სოციალური ქსელებით გავრცელდა დუბაიში გადაღებული ვიდეო, რომელშიც მელაძე სიტყვებს: დიდება უკრაინა (Слава Україні!), პასუხობს: დიდება გმირებს (Героям слава!).

  • ამას რუსეთში კრიტიკა მოჰყვა და პროპაგანდისტებმა ის "უკრაინელი ნაციონალისტების" მხარდაჭერაში დაადანაშაულეს.
  • პარტია სამართლიანი რუსეთი — სიმართლისთვის ხელმძღვანელმა განაცხადა, რომ მელაძეს უნდა ჩამოერთვას ყველა არსებული ტიტული.
  • პარლამენტის ზედა პალატის, ფედერაციის საბჭოს წევრმა კი მოქალაქეობის ჩამორთმევა მოითხოვა.
  • პასუხად მელაძემ განაცხადა, რომ მისთვის "ძალიან საყვარელ ერებს კონფლიქტი აქვთ, რომელშიც ადამიანები იღუპებიან" და მხოლოდ ის სურს, ანტაგონიზმი შეჩერდეს და "ახლო ერებს შორის ურთიერთშეთანხმება დამყარდეს".

დეტალები: როგორც ჩანს, რუსეთში მელაძის წინააღმდეგ კამპანია დაიწყეს. ადგილობრივი მედიები წერენ, რომ ის "შავ სიაში" მოხვდა.

  • კრემლისტური კამსამოლსკაია პრავდას ინფორმაციით, 8 მარტს მოსკოვში დაგეგმილ კონცერტზე ის ვლადიმირ პრესნიაკოვით ჩაანაცვლეს.
  • პროპაგანდისტული რია კი წერს, რომ 2023 წლის გაზაფხულზე მელაძეს ციმბირის ქალაქებში გასტროლები ჰქონდა დაგეგმილი, კერძოდ: ნოვოსიბირსკში, კრასნოიარსკში, ირკუტსკში და ბარნაულში.
  • მათივე თქმით, ირკუტსკში 4 მაისს დაგეგმილი კონცერტი უკვე გაუქმდა.
  • რუსული მედიები წერენ იმასაც, რომ მელაძის ვებგვერდზე ეს კონცერტები ჯერ კიდევ აფიშაზეა, თუმცა ამ ეტაპზე იქ მხოლოდ ისრაელსა და კვიპროსში დაგეგმილი კონცერტების შესახებ წერია.