გადაწყვეტილება მოსამართლე მაია თეთრაულმა გამოაცხადა.

რატომ არის მნიშვნელოვანი: სასამართლო TV პირველის ოპერატორზე, ლექსო ლაშქარავასა და ჟურნალისტ მირანდა ბაღათურიაზე, ასევე, საზოგადოებრივი მაუწყებლის ოპერატორ, ილია თვალიაშვილზე ძალადობაში მსჯავრდებულების პირველი ინსტანციის გამოტანილ განაჩენზე მსჯელობდა.

  • 5 ივლისს რუსთაველის გამზირზე, სადაც ღირსების მარში იყო დაგეგმილი, პრორუსულმა ძალადობრივმა ჯგუფებმა და სასულიერო პირებმა დააორგანიზეს ძალადობა — აქტივისტების ოფისები დაარბიეს, ფიზიკურად გაუსწორდნენ 50-ზე მეტ ჟურნალისტს.
  • ამ დრომდე დანაშაულის ორგანიზატორები არ დასჯილან და ახალ კანონსაწინააღმდეგო ქმედებებში მონაწილეობენ.
  • საქალაქო სასამართლოს მიერ 4 აპრილს მიღებული გადაწყვეტილებით, დაკავებულ 6 პირს 5-5-წლიანი პატიმრობა ჰქონდათ შეფარდებული.

დეტალები: მოსამართლემ დაცვის მხარის საჩივრები ნაწილობრივ, ხოლო პროკურორ თამარ იაკობიშვილის სააპელაციო საჩივარი არ დააკმაყოფილა.

  • სააპელაციოს გადაწყვეტილებით, დავით კუტალაძე, თორნიკე დავლაშერიძე, გია გიგუაშვილი, აკაკი ნაკაშიძე, ოთარ გელაშვილი და ცოტნე ჩიხლაძე სსსკ-ის 225-ე მუხლის მე-2 ნაწილში, რაც ორგანიზებულ ძალადობაში მონაწილეობას გულისხმობს, გამართლდნენ.
  • დანარჩენ მუხლებში ისინი დამნაშავედ ცნეს და თავისუფლების აღკვეთა 4 წლით განესაზღვრათ.