საქართველოს მთავარი პროკურორის მოადგილის თანამდებობაზე ფინანსთა სამინისტროს საგამოძიებო სამსახურის ყოფილი უფროსი და ყოფილი მთავარი პროკურორი გიორგი ბადაშვილი დაინიშნა. მთავარი პროკურორის მოადგილის დანიშვნის ბრძანებას ხელი დღეს მოეწერა. ინფორმაციას ამის შესახებ მთავრი პროკურატურა ავრცელებს.

გიორგი ბადაშვილი 1981 წელს თბილისში დაიბადა. მან 2003 წელს დაამთავრა საქართველოს ტექნიკური უნივერსიტეტის იურიდიული ფაკულტეტი. გიორგი ბადაშვილმა კარიერა საქართველოს ფინანსთა სამინისტროს საგამოძიებო სამსახურში 2006 წლის ივლისიდან დაიწყო და სხვადასხვა თანამდებობებს იკავებდა.

2014 წლის 21 იანვრიდან 2015 წლის 2 დეკემბრამდე მას ეკავა საქართველოს მთავარი პროკურორის თანამდებობა. ამჟამინდელი მთავარი პროკურორი ირაკლი შოთაძე, ამ პერიოდიში სწორედ ბადაშვილის მოადგილე იყო.

ბადაშვილი 2015-2017 წლებში მუშაობდა საგამოძიებო სამსახურის ხელმძღვანელის თანამდებობაზე. ის ფლობს ქართულ, რუსულ და ინგლისურ ენებს.