ბილ ბრაუდერი ყოფილი პრეზიდენტის მიმართვას ტვიტერზე გამოეხმაურა.

რატომ არის მნიშვნელოვანი: 8 იანვარს სააკაშვილმა ბრაუდერს თხოვნით მიმართა, ქართულ ჯგუფებს მაგნიტსკის ახალი სიის შექმნაში დაეხმაროს.

  • "მე მკლავენ ციხეში ზუსტად ისე, როგორც მაგნიტსკის, მაგრამ ბევრად უფრო აშკარად და საჯაროდ", — ნათქვამია ექსპრეზიდენტის წერილში.

  • მაგნიტსკის აქტი აშშ-ში 2012 წელს მიიღეს. მისი სანქციების სამიზნე რუსეთის ის მოქალაქეები იყვნენ, რომლებიც, ვაშინგტონის აზრით, ადამიანის უფლებებსა და კანონის უზენაესობას არღვევენ.

  • 2008 წელს, მას შემდეგ, რაც მაგნიტსკიმ რუსეთის ხელისუფლება კორუფციასა და სამსახურებრივი უფლებამოსილების გადაჭარბებაში ამხილა, ის დააპატიმრეს, 11 თვეში კი ციხეში დაიღუპა.

დეტალები: ბრაუდერი სააკაშვილს იმ დოკუმენტების გადაცემას სთხოვს, სადაც ჩანს, თუ ვინ არიან პასუხისმგებლები წამებასა და მოწამვლაზე, რაზეც ყოფილი პრეზიდენტი საუბრობს.

  • "მიხეილ, გთხოვთ, თქვენმა გუნდმა მოამზადოს დოკუმენტი, ვინ აჩერებს სამედიცინო მკურნალობას, ვინ არის პასუხისმგებელი მოწამვლასა და წამებაზე და მე ყველაფერს გავაკეთებ, რათა დასავლეთის მთავრობებმა მაგნიტსკის სანქციებისთვის ამას ყურადღება მიაქციონ", — წერს ბრაუდერი.

მანამდე, 22 დეკემბერს ბრაუდერმა დაწერა, რომ სააკაშვილი პოლიტპატიმარია, რომელიც "ჩვენს თვალწინ კვდება" და ეს საქართველოს ხელისუფლების პასუხისმგებლობაა.

  • მისივე განცხადებით, ექსპრეზიდენტს ევროპაში სასწრაფო სამედიცინო ევაკუაცია სჭირდება და თუ ეს ასე არ მოხდება, ამას მხოლოდ მკვლელობა შეიძლება, ეწოდოს.