სხვადასხვა ქალაქებში აქციაზე მყოფი ადამიანები მიხეილ სააკაშვილის გადარჩენას და მის სამკურნალოდ საზღვარგარეთ გადაყვანას ითხოვენ.

რატომ არის მნიშვნელოვანი: დღეს რუსი უფლებადამცველის, მარკ ფეიგინის ინიციატივით, ექსპრეზიდენტ მიხეილ სააკაშვილის მხარდასაჭერი "გლობალური აქციები" ჩატარდა.

• მიხეილ სააკაშვილის სიცოცხლის გადარჩენის მოთხოვნით მსოფლიოს 20-ზე მეტ ქალაქში აქცია გაიმართა.
• საზღვარგარეთის აქციები ძირითადად საქართველოს საელჩოს შენობებთან იმართებოდა.

დეტალები: ორი აქცია ჩატარდა საქართველოს დედაქალაქში.

• კანცელარიის შენობასთან გამართა ენმ-ის თავმჯდომარეობის ერთ-ერთი კანდიდატის, ლევან ხაბეიშვილის ორგანიზებული აქცია მიხეილ სააკაშვილის მხარდასაჭერად, საიდანაც მომიტინგეები ბიძინა ივანიშვილის ბიზნეს ცენტრისკენ გაემართნენ.
• ასევე, მსგავსი შინაარსის აქცია გამართა ერთიანმა ნაციონალურმა მოძრაობამ მშვიდობის ხიდთან.

• მშვიდობის ხიდთან აქციის მონაწილეებმა საქართველოს ჰიმნი გააჟღერეს და გადმოკიდეს ბანერი "თავისუფლება მიშას".

შეკვეთილში, ივანიშვილის რეზიდენციის მიმდებარე ტერიტორიაზე მიხეილ სააკაშვილის მხარდამჭერი აქცია გაიმართა.

• შეკვეთილში აქცია ენმ-ის თავმჯდომარეობის კანდიდატმა, აქტივისტმა გიორგი მუმლაძემ და მისმა მხარდამჭერებმა გამართეს.

ჭორვილაში დაგეგმილი მსგავსი შინაარსის აქცია ჩაიშალა.

• აქციის მონაწილეები ბიძინა ივანიშვილის სახლთან მობილიზებულმა ადგილობრივებმა და სამართალდამცავებმა ტერიტორიაზე არ შეუშვეს.

• ადგილობრივებმა აგრესიული ქმედებებით მიხეილ სააკაშვილის მხარდამჭერებს ბანერების და დროშების გაშლის საშუალება არ მისცეს.

• აქციის მონაწილის, ალიკა კუპრავას განცხადებით, "როგორც მოსალოდნელი იყო, ბიძინა ივანიშვილმა სოფლის ყველა შესასვლელი ჩაკეტა, შსს ქცეულია მის პირადი დაცვის სამსახურად".

ექიმების აქცია სააკაშვილის სიცოცხლის გადასარჩენად ექიმებმა პოლიტიკური ძალებისგან დამოუკიდებლად ჩაატარეს.

• აქციის მონაწილეები საქართველოს პრეზიდენტს მიხეილ სააკაშვილის შეწყალებისკენ მოუწოდებდნენ.
• აქციის მონაწილეების განცხადებით, ისინი განსაკუთრებულ ვალდებულებას გრძნობენ ექსპრეზიდენტის ჯანმრთელობის მდგომარეობის მიმართ და მოუწოდებენ სალომე ზურაბიშვილს, გამოიყენოს კონსტიტუციური უფლება და შეიწყალოს სააკაშვილი.
• აქციას შეუერთდა მიხეილ სააკაშვილის ძმა, დავით სააკაშვილიც.
  "ჩვენი მთავარი სათქმელი, რეალურად არის ის, რომ გვეყოფა ერთ წრეზე სიარული, რომ გვეყოფა პრეზიდენტების კვლა. ისტორია არ უნდა გავიმეოროთ, ჩვენ უნდა მივცეთ საშუალება ქვეყანას ევროპის ოჯახში რეალურად დაიმკვიდროს ადგილი."
• დავით სააკაშვილის შეფასებით, დღეს დაგეგმილმა გლობალურმა აქციებმა უნდა აჩვენოს, რომ "ჰუმანური ხალხი ვართ, კაცთმოყვარე, ჩვენ გვჯერა დღევანდელი დღის და ადამიანის სიცოცხლე უნდა გადავარჩინოთ".'

კონტექსტი: მიხეილ სააკაშვილმა ფეიგინს კლინიკიდან წერილი გაუგზავნა, სადაც მისი სავარაუდო მოწამვლის შესახებ აცნობა.

• ფეიგინმა, თავისი ითუბ-არხის მეშვეობით მიხეილ სააკაშვილის სიცოცხლის გადარჩენის მიზნით ხალხს მსოფლიოს სხვადასხვა ქალაქებში აქციებზე გამოსვლისკენ მოუწოდა.
• მოწოდებას შეუერთდა უკრაინის პრეზიდენტის ოფისის მრჩეველი, ოლექსი არესტოვიჩიც.