საახალწლო დღეებში ოჯახის წევრებთან, მეგობრებთან, ნაცნობებთან თუ უცნობებთან ერთად დიდი დროის გატარება გვიწევს, ვაცილებთ წინა წელს და მომავლის სურვილებსაც ვაჟღერებთ. არიან ისეთი ადამიანები, რომლებიც ლხინისას ენად გაიკრიფებიან და ერთიანად გვავიწყდება, რისი თქმა უნდოდათ, თუმცა ზოგიერთს სიტყვების თავმოყრა და სადღეგრძელოს თქმა უჭირს.

სხარტი, თუმცა შინაარსიანი სადღეგრძელოს საიდუმლო იდიომებშია. სწორედ ეს ფრთიანი ფრაზები გვეხმარება რომ, სადღესასწაულო მღელვარებით დაბნეულებმა, აზრებს თავი მოვუყაროთ და ერთმანეთს ყოველივე კარგი ვუსურვოთ.

თუ ჯერაც არ იცი, რომელი სადღეგრძელოთი უნდა შეხვდე ახალ წელს, სანერვიულო არაფერია! თიბისი დაზღვევის კამპანიის ფარგლებში ცნობილი იდიომები სადღეგრძელოებად გარდაიქმნა და შეიძლება სადღესასწაულო შეკრებისთვის ინსპირაციაც მოგცეს.

1. ჭკუაში რაც დაგიჯდებათ, ყველაფერი გამოგსვლოდეთ!

ახალ წელს იდეებით ვართ სავსე. ეს ის დროა, როცა სამომავლო მიზნებზე ყველაზე აქტიურად ვფიქრობთ. ყველას გვაერთიანებს სურვილი, რომ მომდევნო წელს გამოგვივიდეს ყველაფერი, რაც ჭკუაში დაგვიჯდება. ასე მარტივად შეგიძლია, ადამიანებს იმედი მისცე, რომ მომდევნო წელი მათი გულისნადების ასრულების წელი იქნება.

2. თქვენი ჭიის გახარება დაგბედებოდეთ!

საახალწლო ჟრიამული კიდევ ერთხელ გვახვედრებს, რამდენად მნიშვნელოვანია ჭიის გახარება, საკუთარ თავზე ზრუნვა, პერსონალური სურვილების გათვალისწინება — ეს განცდა ბევრი ადამიანისთვის საზიაროა. ამიტომ, ადამიანებს სადღეგრძელოთი შეგიძლიათ შეახსენო, რომ ჭიის გახარება არ დაივიწყონ.

3. ისეთ წელს გისურვებთ, ჩიტი ბრდღვნად ღირდეს!

ხშირად რთულ მიზნებს ვეჭიდებით და ზოგჯერ იმედდაკარგულები ვფიქრობთ, რომ ჩიტი ბრდღვნად არ ღირს. საახალწლო სუფრა ადამიანების მხარდაჭერისთვის, მათთვის მოტივაციის მიცემისთვის საუკეთესო ადგილია. ამიტომ შეგიძლია, შენი სადღეგრძელო სწორედ იმის გასაჟღერებლად გამოდგეს, რომ მომდევნო წელს ჩიტი ბრდღვნად ეღირება.

4. ეს ოჯახი სულ ფრთებშესხმული მენახოს!

საახალწლო დღეებში ოჯახური ერთიანობა ყველაზე მეტად იგრძნობა და მომდევნო წლის სურვილებშიც ერთ-ერთი უმთავრესი ოჯახის კეთილდღეობაა. თუ სადღეგრძელოთი იტყვი, რომ გინდა, საკუთარი თუ სხვისი ოჯახი ფრთაშესხმული ნახო, ყველა ადამიანის გულისნადებს ჩასწვდები.

5. გისურვებთ ის დრო მოვიდეს, ყველა სურვილი რომ აგიხდებათ!

ისევ და ისევ სურვილები და იმედებია წინა წლის გაცილების და ახლის დახვედრის განუყოფელი ნაწილი. რა არის იმაზე პოზიტიური, ვიდრე ადამიანებისთვის იმის თქმა, რომ სურვილების ასრულების დრო სწორედ ახლა იწყება?!

6. გულზე რაც გეხატებათ, ყველაფრისთვის მიგეღწიოთ!

რამდენი რამე გვეხატება გულზე, თუმცა ზოგიერთი ჩანაფიქრის მიღწევისთვის დრო ან მოტივაცია არ გვაქვს. საახალწლო შეკრებისას ადამიანებს კიდევ ერთხელ შეახსენე, რომ დაფიქრდნენ ყველაფერზე, რაც გულზე ეხატებათ და მათ მისაღწევად ძალ-ღონე არ დაიშურონ.

7. ყველა მიზნის დამწიფების წელი იყოს!

მიზნის მომწიფებას დრო სჭირდება, ჩვენ კი მუდამ გვეჩქარება და ხშირად ერთი სული გვაქვს, ყველაფერი მარტივად გამოვიდეს. ადამიანებს საახალწლოდ შეგიძლია სადღეგრძელოთი შეახსენო, რომ მიზნის მიღწევას დრო სჭირდება და უსურვო, ახალი წელი ყველა მიზნების მომწიფების დრო იყოს.

8. მრავალი ახალი მთის გადადგმას გისურვებთ!

დაბოლოს, ყველა წვრილმანი სურვილი თუ დიდი მიზანი გვაახლოებს ახალ-ახალ მთების გადადგმასთან. ვის არ უნდა, რომ რაღაც მნიშვნელოვანი, დიდი ხნის დასახული გეგმა განხორციელდეს?! ამიტომ, რა უნდა უსურვო ადამიანს იმაზე უკეთესი, ვიდრე ახალი მთების გადადგმაა!