ზუგდიდის რაიონულმა სასამართლომ კორცხელის ინციდენტში ბრალდებულ 6-ვე პირს გირაოს გადახდა დააკისრა. აღნიშნული 6 პირიდან სასამართლომ 5 პირს - 7 ათასლარიანი, ხოლო 1 პირს 10 ათასლარიანი გირაოს გადახდა დააკისრა.

ერთ-ერთი ბრალდებულის ადვოკატი, ზურაბ ბელთაძე განმარტავს, რომ ბრალდებულები და ბრალდებულთა ადვოკატები სასამართლოს გადაწყვეტილებას არ ეთანხმებიან და გასაჩივრების პროცედურასთან დაკავშირებით იმსჯელებენ.

ახალგაზრდა იურისტთა ასოციაციის წარმომადგენელი, მიხეილ ჯახუა კი ამბობს, რომ პროკურატურა ავლენს არათანამიმდევრულობას, ვინაიდან ერთგვაროვან საქმეებზე არაერთგვაროვან აღკვეთის ღონისძიებას ითხოვს:

"თუმცა, თუკი ცალკე მდგომად განვიხილავთ წარდგენილი ბრალის მუხლს, ამ შემთხვევაში უნდა შევაფასოთ ის პროპორციულად. გარდა ამისა მიგვაჩნია, რომ გამოძიება უნდა გაგრძელდეს იმისთვის, რომ სხვა დანაშაულის ნიშნებს ხომ არ შეიცავს მათი ქმედება. გარდა ამისა, ყოველმხრივი და სრულყოფილი გამოძიების შედეგად უნდა გამოვლინდეს ამ დანაშაულში ჩართული სხვა პირები".

საქმის პროკურორის, თეიმურაზ ჯალაღონიას განმარტებით კი გირაოს გამოყენების საფუძველი შუამდგომლობაშიც იყო მითითებული:

"სხვა აღკვეთის ღონისძიება იმიტომ არ გამოვიყენეთ, რომ ბრალდებულები თავად გამოცხადდნენ საგამოძიებო ორგანოში საგამოძიებო მოქმედებაში მონაწილეობის მიზნით. ამავე დროს ისინი ყველა გამოძახებაზე გამოცხადნენ. შესაბამისად არ არსებობდა მიმალვის საფრთხე".

კორცხელის ინციდენტში მონაწილეებმა სასამართლოს შენობა კომენტარის გარეშე დატოვეს. აღნიშნული საქმის წინასასამართლო სხდომა 28 ივლისს ჩანიშნეს.