საქართველოს საზოგადოებრივი მაუწყებლის სამეურვეო საბჭოს წევრის შესარჩევი კომისიის თავმჯდომარე მოსწავლე ახალგაზრდობის სასახლის დირექტორი თინათინ რუხაძეა. ინფორმაცია ამის შესახებ საზოგადოებრივი მაუწყებელი ავრცელებს.

თინათინ რუხაძეს 2012 წელს საზოგადოებრივი მაუწყებლის გენერალური დირექტორობა სურდა, თუმცა, მისი მცდელობა წარუმატებლად დასრულდა. ის პროფესიით პიანისტია. თუმცა, წლების განმავლობაში სხვადასხვა ორგანიზაციის მმართველ რგოლში მუშაობდა.ის სხვადასხვა დროს იყო „ივენთ მასტერსის“ - მენეჯერი, სამშენებლო კომპანია „დექსუსის“ - კადრების მენეჯერი და საზოგადოებასთან ურთიერთობის სამსახურის ხელმძღვანელი.

კომისიის შემადგენლობის შესახებ ცნობილი მიმდინარე წლის პირველ ივნისს გახდა. რუხაძის გარდა, კომისიის წევრები არიან:

  • გალუმაშვილი სოსო - საზოგადოებასთან ურთიერთობის კონსულტანტი, პიარ-სააგენტო "ჯეპრას" დამფუძნებელი და ხელმძღვანელი, ქართულ-ამერიკული უნივერსიტეტის პიარ სკოლის დამფუძნებელი და ლექტორი;
  • თვალაძე თინათინ - ბლოგერი;
  • მხეიძე ზურაბ - ფსიქოლოგი;
  • სტეფანიანი არნოლდ - არასამთავრობო ორგანიზაცია "მრავალეროვანი საქართველოს" თავმჯდომარე;
  • ტატიშვილი ოთარ - ექიმი და ტელეწამყვანი;
  • ფოცხიშვილი ბასა - რეჟისორი, "სტუდია 1 2 3"-ის დამფუძნებელი;
  • შიდაშვილი მარინე - თბილისის სახელმწიფო უნივერსიტეტის სოციალურ და პოლიტიკურ მეცნიერებათა ფაკულტეტის პროფესორი;
  • ჯოლოგუა თამაზ - თბილისის სახელმწიფო უნივერსიტეტის სოციალურ და პოლიტიკურ მეცნიერებათა ფაკულტეტის ჟურნალისტიკის მიმართულების ასოცირებული პროფესორი.

სამეურვეო საბჭოს წევრის შესარჩევი კონკურის გამოცხადების ბრძანება საქართველოს პარლამენტის თავმჯდომარემ, ირაკლი კობახიძემ 29 მაისს გამოსცა. განაცხადების 2017 წლის 13 ივნისამდე მიიღება.

თითქმის ერთი წელია, რაც ცხრაწევრიანი სამეურვეო საბჭო რვა წევრით არის დაკომპლექტებული. ამ შემთხვევაშიც, ვაკანტურია უმრავლესობის მიერ დასასახელებელი მეურვის კვოტა. მეურვის თანამდებობა მას შემდეგ გახდა ვაკანტური, რაც ნათელა სახოკიამ, შვილის - ირაკლი რუხაძის ტელეკომპანია იმედის სამეთვალყურეო საბჭოს თავმჯდომარედ დანიშვნის გამო, 13 ივნისს დატოვა.