პრეზიდენტმა ჯო ბაიდენმა უკრაინის პრეზიდენტს კიდევ ერთხელ გამოუცხადა მხარდაჭერა და უთხრა, რომ ის ყველაზე მნიშვნელოვანი ადამიანი გახდა მსოფლიოში.

რატომ არის მნიშვნელოვანი: ომის დაწყების შემდეგ უკრაინის პრეზიდენტს ქვეყანა არ დაუტოვებია. პირველი ოფიციალური ვიზიტით ის აშშ-ს ეწვია.

  • აეროპორტიდან ზელენსკი თეთრ სახლში მივიდა, სადაც მას აშშ-ს პრეზიდენტი და პირველი ლედი დახვდნენ.
  • პრეზიდენტებმა მედიის თანდასწრებით ერთმანეთს მიმართეს, რის შემდეგაც დახურული შეხვედრა დაიწყო.

ფოტო: EPA

ფოტო: Getty Images

ფოტო: Getty Images

დეტალები: ზელენსკიმ შეხვედრისას აღნიშნა, რომ მისთვის დიდი პატივია ამერიკაში ყოფნა და მას აქამდეც უნდოდა ჩასვლა, თუმცა მძიმე სიტუაციის გამო ვერ შეძლო.

  • "სიტუაცია იმდენად მძიმე იყო, რომ მოვსულიყავი, ალბათ, დავკარგავდი კონტროლს. ძალიან დიდ მადლობას ვუხდი ამერიკას მხარდაჭერისთვის. ჩვენ ბევრი გვაქვს სასაუბრო თემა", — თქვა უკრაინის პრეზიდენტმა.
  • ზელენსკის განცხადებით, ახლა პრობლემა არა მხოლოდ უკრაინაში, არამედ ევროპაშიც არსებობს, რადგან ომის პროცესი ყველაფერს აზიანებს.
  • "საბრძოლო მოქმედებებმა დააზიანა როგორც ინფრასტრუქტურა, ასევე კრიტიკული მნიშვნელობის ობიექტები, მათ შორის, ელექტროენერგიის დიდი ნაწილი. მე მადლიერი ვარ ყველა ერის, რომელმაც დახმარება გაგვიწია. თქვენ [ამერიკა] ამ ქვეყნების სიაში პირველი ხართ", — თქვა ზელენსკიმ.
  • მან მადლობა გადაუხადა "ამერიკის ჩვეულებრივ მოქალაქეებს უკრაინის ჩვეულებრივი მოქალაქეებისგან" და თქვა, რომ ალბათ, უჭირთ გაიგონ რას გულისხმობენ, როცა მადლობას იხდიან, თუმცა მადლიერება მადლიერება სულის ყველაზე ღრმა კუთხიდან მოდის.

ფოტო: Reuters

პრეზიდენტმა ზელენსკიმ საუბრის ბოლოს ყურადღება ბახმუტში არსებულ ვითარებაზე გაამახვილა და აღნიშნა, რომ იქ საკუთარი თვალით ნახა ბევრი რამ, ომის ყველაზე ცხელ წერტილში.

  • ამის შემდეგ ჯო ბაიდენს უკრაინელი სამხედროსგან საჩუქარი გადასცა, რომელიც მას სიმამაცისა და გმირობისთვის მიენიჭა.
  • "ის ძალიან მამაცია და მითხრა: გადაეცი ეს მამაც პრეზიდენტს" — განაცხადა ზელენსკიმ.
  • ბაიდენმა აღნიშნა, რომ ეს ჯილდო მას არ დაუმსახურებია, მაგრამ აფასებს და მადლიერია. მან სურვილი გამოთქვა, უკრაინელ სამხედროს დაუკავშირდეს.