თითქმის ერთთვიანი პაუზის შემდეგ, რუსეთმა ირანული დრონებით დაბომბვები განაახლა.

რატომ არის მნიშვნელოვანი: გამთენიისას ვინიცას, ჩერკასის, კიროვოგრადის რეგიონებში და ქალაქ კიევში საჰაერო განგაში გამოცხადდა.

  • დიმიტრი კულებამ განაცხადა, რომ მოქმედებდა საჰაერო თავდაცვა და მოსახლეობას თავშესაფრებსა და უსაფრთხო ადგილებზე დარჩენისკენ მოუწოდა.
  • ღამის განმავლობაში თავდაცვის ძალებმა 30 ირანული დრონი გაანადგურეს, რომლითაც ოკუპანტები კიევის რეგიონს ბომბავდნენ.
  • უკრაინსკა პრავდას ინფორმაციით, მანამდე, 18 დეკემბერს, საღამოს, ირანული კამიკაძე დრონები ნიკოლაევის რაიონშიც დაფიქსირდა.

დეტალები: ირანული დრონების თავდასხმის შედეგად დაზიანდა ინფრასტრუქტურული ობიექტები და კერძო სახლები, დაშავდა ორი ადამიანი.

  • უკრაინის შეიარაღებული ძალების განმარტებით, ქვეყანას აქვს საჰაერო თავდაცვის სისტემა, რომელსაც შეუძლია თვალი მიადევნოს და იპოვოს დრონები ვიზუალურად, მაგრამ სიბნელეში სამიზნეს მარტივად ვერ პოულობს, ამიტომ ოკუპანტები თავდასხმისთვის საღამოს საათებს იყენებენ.

კონტექსტი: რუსეთმა უკრაინის მშვიდობიან მოსახლეობასა და სამოქალაქო ინფრასტრუქტურაზე თავდასხმისთვის ირანული წარმოების ასობით დრონი გამოიყენა.

  • ირანის ხელისუფლებამ არაერთხელ უარყო რუსეთისთვის საფრენი აპარატების მიწოდება, მაგრამ საერთაშორისო თანამეგობრობას, ამის არ სჯეროდა, რის გამოც სანქციები დააწესეს.
  • ირანის საგარეო საქმეთა მინისტრმა 5 ნოემბერს პირველად აღიარა, რომ უპილოტო თვითმფრინავების "მცირე რაოდენობა" რუსეთს ომამდე რამდენიმე თვით ადრე მიაწოდა.
  • ISW ირანულ მედიაზე დაყრდნობით წერს, რომ ირანის შეიარაღებული ძალების გენერალური შტაბის უფროსი, გენერალ-მაიორი მოჰამედ ბაგერი, 3 დეკემბერს თეირანში რუსეთის თავდაცვის მინისტრის მოადგილეს, გენერალ პოლკოვნიკ ალექსანდრ ფომინს შეხვდა.
  • ISW ვარაუდობს, რომ მათ რუსეთისთვის უკრაინაში გამოსაყენებლად ირანული თვითმფრინავებისა და რაკეტების მიყიდვა განიხილეს.
  • გარდა ამისა, The Washington Post წყაროებზე დაყრდნობით წერს, რომ ირანი რუსეთს დრონების წარმოებაში დაეხმარება.