ჟურნალისტების შეხვედრა საქართველოში ევროკავშირის ელჩთან, იანოშ ჰერმანთან დასრულდა. ჟურნალისტები ელჩს თბილისიდან გაუჩინარებული აზერბაიჯანელი კოლეგის, აფგან მუხტარლის საქმეზე შეხვდნენ. შეხვედრაზე იმყოფებოდა ჟურნალისტური ეთიკის ქარტიის აღმასრულებელი დირექტორი, ნატა ძველიშვილი, რომელმაც თქვა:

"განსხვავებით ჩვენი ხელისუფლებისგან, დიპლომატიური კორპუსი გვხვდება, რაც ძალიან მნიშვნელოვანია. ჩვენ, რა თქმა უნდა, ჩვენი შეშფოთება გავუზიარეთ ელჩს და ამ შეშფოთებას ისიც იზიარებს. როგორც მან თქვა, ისინი ხვდებიან ჩვენი ხელისუფლების სხვადასხვა წარმომადგენლებს, პოლიტიკურ პარტიებს, პრეზიდენტს და ცდილობენ ინფორმაციის მოგროვებას, რის შემდეგაც ისინიც გააკეთებენ დასკვნებს.

ჩვენ გავაკეთებ ყველაფერს იმისთვის, რომ ამ საქმეს ნათელი მოეფინოს. გამოვიყენებთ ჩვენს შესაძლებლობებს იმისთვის, რომ შევხვდეთ ყველას, ვისაც შეიძლება რამე უნარი შესწევდეს გავლენა მოახდინოს ჩვენს ხელისუფლებაზე".

შეხვედრაზე იმყოფებოდა სტუდია მონიტორის ერთ-ერთი ხელმძღვანელი, ნანა ბიგანიშვილიც

"ჩვენ აღშფოთებული ვართ, რადგან, მიუხედავად იმისა, რომ მესამე დღეა შევიტანეთ განცხადება პარლამენტის თავმჯდომარის სახელზე, არ გვხვდება არავინ და არ გვეუბნებიან, რა ხდება. ჩვენ რა ინფორმაციაც გვქონდა, მივაწოდეთ ბატონ ელჩს. მან გვითხრა, რომ, რა თქმა უნდა, დაინტერესებულია ამ საქმით. მისივე თქმით, დიდი განსხვავებაა საქართველოსა და აზერბაიჯანს შორის და ისინი ვერ გააიგივებენ ამ ორ ქვეყანას, იქიდან გამომდინარე, რომ ჩვენ ვამბობდით, რომ ამ ფაქტმა (გატაცებამ) ჩამოშალა მითი, თითქოს მეზობელი ქვეყნებისგან განსხვავებით, ჩვენთან, ასე თუ ისე, დაცულია სიტყვის თავისუფლება".

ჟურნალისტები ევროკავშირის ელჩის შემდეგ, 6 ივნისს, შეხვდებიან საქართველოში აშშ-ს ელჩს.

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს. თბილისში რამდენიმე დღეა ჟურნალისტები და არასამთავრობო ორგანიზაციები მუხტარლის მხარდასაჭერ აქციებს მართავენ. საქართველოს პრემიერმინისტრმა მოუწოდა პრეზიდენტს, მუხტარლის ცოლ-შვილს დაჩქარებული წესით მიანიჭოს საქართველოს მოქალაქეობა. მუხტარლის ცოლმა, ლეილა მუსტაფაევამ On.ge-ს უთხრა, რომ მას არ სჭირდება იმ ქვეყნის მოქალაქეობა, საიდანაც მისი ქმარი გაიტაცეს.