აზერბაიჯანელი ჟურნალისტის, აფგან მუხტარლის ცოლმა, ლეილა მუსტაფაევამ On.ge-ის განუცხადა, რომ მას არ სჭირდება საქართველოს მოქალაქეობა და პრემიერის შეთავაზებაზე უარს ამბობს:

"მე არ დავთანმხდები საქართველოს მოქალაქეობას. მე არ მჭირდება იგი. მე ვერ ვიქნები იმ ქვეყნის მოქალაქე, სადაც ჩემი ქმარი გაიტაცეს".

პრემიერმა გიორგი კვირიკაშვილმა დღეს, საგანგებო განცხადება გამოაქვეყნა, სადაც იგი საქართველოს პრეზიდენტს, სთხოვს შექმნილი ვითარებიდან გამომდინარე, გამონაკლისის სახით, შეძლებისდაგვარად, მოკლე ვადაში მიანიჭოს აფგან მუხტარლის ცოლსა და შვილებს საქართველოს მოქალაქეობა.

პრეზიდენტის ადმინისტრაციის ხელმძღვანელმა, გიორგი აბაშიშვილმა მალევე გააჟღერა, რომ პრეზიდენტი მზადაა ოჯახის სურვილის შემთხვევაში, მათ მოქალაქეობა მიანიჭოს.

29 მაისს, თბილისიდან გაუჩინარდა აზერბაიჯანის ხელისუფლების მიერ დევნილი ჟურნალისტი, აფგან მუხტარლი. მოგვიანებით გაირკვა, რომ ის აზერბაიჯანშია დაპატიმრებული, 31 მაისს კი, აზერბაიჯანის სასამართლომ მას სამთვიანი წინასწარი პატიმრობა შეუფარდა. საქართველოს შინაგან საქმეთა სამინისტრო ამ ეტაპზე მხოლოდ აზერბაიჯანელი კოლეგების მიერ მიწოდებულ ინფორმაციას აჟღერებს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს. თბილისში რამდენიმე დღეა ჟურნალისტები და არასამთავრობო ორგანიზაციები მუხტარლის მხარდასაჭერ აქციებს მართავენ.