ამის შესახებ ინფორმაცია პროკურატურამ გაავრცელა.

რატომ არის მნიშვნელოვანი: პროკურატურის განცხადებით, კლუბ ქალაქურისა და როიალის მფლობელმა 5 თანამზრახველთან ერთად ორგანიზებული ჯგუფი შექმნა.

  • ბრალდებულების მიერ შემუშავებული გეგმის მიხედვით, ე.წ. პრომო გოგონები ერთ-ერთი სოციალური ქსელის მეშვეობით საქართველოში ჩამოსულ ტურისტებს უკავშირდებოდნენ, დასახელებულ კლუბებში ხვდებოდნენ, ეცნობოდნენ და სტუმრების მაგიდასთან სხდებოდნენ.
  • ანგარიშსწორებისას კი დანაშაულებრივი ჯგუფის წევრები ტურისტებს მიღებული მომსახურების შეუსაბამოდ დიდი თანხების გადახდას სთხოვდნენ და უარის შემთხვევაში მათზე ფსიქოლოგიურად ძალადობდნენ.

დეტალები: სამართალდამცავი უწყების ცნობით, 14 ბრალდებული უცხო ქვეყნის მოქალაქეების კუთვნილ 9 340 ლარს თაღლითურად დაეუფლა.

  • მათ ბრალდება სსკ-ის 180-ე მუხლის მეორე ნაწილის ბ და მეოთხე ნაწილის ა ქვეპუნქტებით წარედგინათ, რაც გულისხმობს ორგანიზებული ჯგუფის მიერ ჩადენილ თაღლითობას, რამაც მნიშვნელოვანი ზიანი გამოიწვია.
  • სასამართლომ დანაშაულებრივი ქმედების ორგანიზატორებს, მათ შორის, კლუბების მეპატრონეს სასჯელის სახით 8 წლითა და 6 თვით თავისუფლების აღკვეთა, ხოლო კლუბების ორ მენეჯერს — 8-8 წლით თავისუფლების აღკვეთა მიუსაჯა.
  • რაც შეეხება ორგანიზებული ჯგუფის სხვა წევრებს, პროკურატურის განცხადებით, მათ გამოძიებასთან თანამშრომლობის ხარისხისა და ზიანის ანაზღაურების ფაქტის გათვალისწინებით, არასაპატიმრო სასჯელზე საპროცესო შეთანხმება გაუფორმდათ.