ევროპის ლიბერალთა და დემოკრატთა ალიანსმა (ALDE) სტრატეგია აღმაშენებლის ავტორობით რეზოლუცია მიიღო.

რატომ არის მნიშვნელოვანი: რეზოლუცია ქართველ ხალხს მხარდაჭერას უცხადებს ევროინტეგრაციის გზაზე და აკრიტიკებს ქართული ოცნების ანტიდასავლურ რიტორიკას, პოლიტიკურ მართლმსაჯულებას, კრიტიკული მედიის დევნასა და დეოლიგარქიზაციას.

  • ტექსტში ნახსენებია მმართველი პარტიის თავმჯდომარე, ნიკა გვარამიას საქმის მოსამართლე და პრორუსული ძალადობრივი ჯგუფის წევრები.

დეტალები: რეზოლუცია მკაცრად გმობს ბრალდებებს, თითქოს დასავლეთს სურს საქართველოს ომში ჩათრევა და აღნიშნავს, რომ ამას არაფერი აქვს საერთო სინამდვილესთან და იმეორებს რუსულ რიტორიკას.

  • "მმართველი პარტიის თავმჯდომარემ ირაკლი კობახიძემ შეწყვიტოს შეურაცხმყოფელი, სიტყვიერი თავდასხმები ევროკავშირის ინსტიტუტებზე და ევროპარლამენტის წევრებზე. ასეთი თავდასხმები საფრთხეს უქმნის საქართველოს ევროკავშირში ინტეგრაციის პროცესს", — ვკითხულობთ ტექსტში.
  • ALDE გმობს პოლიტიკურად მოტივირებული სისხლის სამართლის საქმეებს კრიტიკული მედია საშუალებებისა და მათი მფლობელებისა, ასევე, ოპოზიციის ლიდერების, მათ შორის, მამუკა ხაზარაძისა და ბადრი ჯაფარიძის წინააღმდეგ.

რეზოლუცია მოუწოდებს, რომ ევროსაბჭომ საქართველოს მიანიჭოს კანდიდატის სტატუსი კომისიის მიერ დადგენილი თორმეტიდან 12-ვე პუნქტის შესრულების შემდგომ და დააჩქაროს საქართველოს შეფასების პროცესი კონკრეტული კრიტერიუმებისა და ვადების დაწესებით.

  • მათივე განცხადებით, მმართველმა პარტიამ და საქართველოს ხელისუფლებამ გადამწყვეტი ნაბიჯები უნდა გადადგას დეოლიგარქიზაციისკენ და აღმოფხვრას ბიძინა ივანიშვილის გავლენები საქართველოს სახელმწიფო ინსტიტუტებზე, სასამართლო სისტემაზე, სამართალდამცავ ორგანოებსა და პარლამენტზე;
  • გარდა ამისა, მოუწოდებს საქართველოს პრეზიდენტს, გამოიყენოს საკუთარი დისკრეციული უფლებამოსილება და შეიწყალოს მიხეილ სააკაშვილი და ნიკა გვარამია, როგორც პოლიტიკური სიტუაციის დეპოლარიზაციისა და პოლიტიკურად მოტივირებული მართლმსაჯულების დასრულებისკენ გადადგმული ნაბიჯები.

აკრძალვები: ALDE მიიჩნევს, რომ ევროკავშირის წევრმა ქვეყნებმა უნდა აუკრძალონ ევროკავშირის ტერიტორიაზე შესვლა ანტიდასავლურ პროპაგანდასა და ადამიანის უფლებების დარღვევაში ჩართულ ფიზიკური პირებსა და ჯგუფებს.

  • კერძოდ, რადიკალური ჯგუფის ალტ-ინფოს ლიდერსა და დამფუძნებელს —კონსტანტინე მორგოშიას, რომელიც პასუხისმგებელია მედიის წარმომადგენლებისა და უმცირესობათა ჯგუფების მიმართ განხორციელებული ძალადობის ორგანიზებაზე 2021 წლის 5-6 ივლისს;
  • ასევე, მოსამართლე ლაშა ჩხიკვაძეს, რომელმაც პოლიტიკურად მოტივირებული გადაწყვეტილება მიიღო ტელეკომპანია მთავარის დამფუძნებლის ნიკა გვარამიას დაკავების შესახებ.