ოკუპანტი ქვეყნის დედაქალაქში ეს ღონისძიება 11-დან 13 დეკემბრის ჩათვლით არის დაგეგმილი.

რატომ არის მნიშვნელოვანი: მაშინ, როდესაც რუსეთი უკრაინაში მიმდინარე ომის გამო მთელი მსოფლიოს მიერ იზოლირებულია და ოკუპირებული აქვს საქართველოს ტერიტორიების 20%, ქართული დიასპორის წარმომადგენლები გასართობ რუსულ-ქართულ ღონისძიებას აანონსებენ.

  • მსგავსი ღონისძიებები წლების განმავლობაში გამოიყენება რუსეთში, როგორც პროპაგანდის იარაღი.
  • გაერთიანების ვებგვერდზე გამოქვეყნებული ინფორმაციის თანახმად, ღონისძიების ორგანიზატორია დავით ცეცხლაძე და იგი მოსკოვის მშვიდობის ფონდმა მედლით დააჯილდოვა "რუსული სახელმწიფოს გაძლიერებისთვის".

დეტალები: ღონისძიების მასპინძელი ორგანიზაციაა რუსეთში მცხოვრები ქართველების გაერთიანება — ქართული ეროვნულ-კულტურული ავტონომია.

  • ქართული კულტურის დღეების ფარგლებში, იგეგმება რუსეთის ქართული დიასპორის ფორუმი, ასევე, კულტურული ღონისძიებები, გამოფენები, ქართული კულინარიის მასტერკლასები, ლექციები და სხვა.
  • ქართული კულტურის დღეების აღნიშვნა 13 დეკემბერს დიდ კოსმოსის საკონცერტო დარბაზში "გრანდიოზული" კონცერტით "ჩვენ ერთად ვართ" დასრულდება.
  • ღონისძიებაში მონაწილეობას მიიღებს სხვადასხვა ქართველი და რუსი შემსრულებელი და ქორეოგრაფიული ჯგუფები.
  • ორგანიზაცია კულტურის დღეებზე დეტალური ინფორმაციის გამოქვეყნებას პირველ დეკემბერს, ტელეგრამის არხზე აანონსებს.

ამასთანავე, 28 ნოემბერს დავით ცეცხლაძემ ცენტრ პრიმაკოვის დირექტორთან, დიმიტრი ლორთქიფანიძესთან სამუშაო შეხვედრა გამართა.

  • პრიმაკოვის სახელობის ქართულ-რუსული საზოგადოების ცენტრი 2013 წელს დაფუძნდა.
  • ცენტრი პუტინის ბრძანებით დაარსებული გორჩაკოვის ფონდისა და ქართული საერთაშორისო ურთიერთობათა ინსტიტუტის მიერ არის შექმნილი.