ამ საკითხზე საპატრიარქოს პრესსამსახურის უფროსმა, ანდრია ჯაღმაიძემ და ახალქალაქის მიტროპოლიტმა, ნიკოლოზ ფაჩუაშვილმა On.ge-სთან ისაუბრეს.

რატომ არის მნიშვნელოვანი: მოსკოვის საპატრიარქომ გაავრცელა ინფორმაცია, რომ ფაჩუაშვილი მოსკოვში იმყოფება და მონაწილეობს კონფერენციაში — რუსეთი. საქართველო. ქრისტიანული აღმოსავლეთი. სულიერი და კულტურული კავშირები.

  • კონფერენცია ანდრეი რუბლიოვის ძველი რუსული კულტურისა და ხელოვნების ცენტრალურ მუზეუმში იმართება.
  • ნათქვამია, რომ მიტროპოლიტი მოსკოვის საპატრიარქოს საგარეო საეკლესიო ურთიერთობის განყოფილების თავმჯდომარეს, მიტროპოლიტ ანტონს შეხვდა.
  • "თბილი და მეგობრული საუბრისას განიხილეს რუსეთისა და საქართველოს მართლმადიდებლური ეკლესიების ურთიერთობების სხვადასხვა ასპექტი".

ფაჩუაშვილის თქმით, მოსკოვში იმყოფება კონფერენციაზე, რომელიც მის ბაბუას, დავით არსენიშვილს ეძღვნება.

  • "გუშინ იყო დავით არსენიშვილის გარდაცვალების დღე, რომელიც სამწუხაროდ, საქართველოში არ აღინიშნება, მიუხედავად იმისა, რომ მან თბილისში დააარსა მთაწმინდის პანთეონი, ლიტერატურული მუზეუმი, თეატრისა და კინოს მუზეუმი, რომლის ეზოშიც მისი ძეგლი დგას, დანგრევას გადაარჩინა ანჩისხატის ტაძარი";
  • მანვე აღნიშნა, რომ 50-იან წლებში დავით არსენიშვილმა მოსკოვში დააარსა ანდრეი რუბლიოვის მუზეუმი და ის დანგრევას გადაარჩინა.

On.ge დაინტერესდა, რამდენად მიზანშეწონილად მიიჩნევს უკრაინაში მიმდინარე ომის ფონზე მოსკოვში ვიზიტს, რაზეც მიტროპოლიტმა თქვა, რომ ეს საეკლესიო შეხვედრაა, ხელისუფლებასთან კი ნებისმიერი შეხვედრის გამართვას გამორიცხავს.

  • "ეკლესიების ურთიერთობის მთავარი მიზანი სწორედ მშვიდობის დამყარების გზების ძიებაა, ჩვენი ძალების შესაბამისად", — აღნიშნა მან.

ჯაღმაიძის განცხადებით, ვიზიტზე ინფორმირებული არ იყო და სოციალური ქსელიდან შეიტყო.

  • "სავარაუდოდ, კერძო მიწვევით ბრძანდება მოსკოვში", — განუცხადა მან On.ge-ს.