გუშინ, 15 ნოემბერს სახელმწიფო უსაფრთხოების სამსახურმა გაავრცელა ინფორმაცია, რომ უცხოეთიდან საქართველოში ისრაელის მოქალაქის მკვლელობა იგეგმებოდა.

რატომ არის მნიშვნელოვანი: სუს-ის ინფორმაციით, დანაშაულებრივმა ჯგუფმა საქართველოში გამოგზავნა პაკისტანელი ქილერი, რომელსაც ისრაელის მოქალაქის მკვლელობა დაევალა.

  • საქართველოში ჩამოსვლამდე მას ჩაუტარდა საჭირო ინსტრუქტაჟი, აქ კი დახვდა დაქირავებული ბინა და გადაეცა კონსპირაციული კავშირის საშუალებები.
  • უწყების ცნობით, პაკისტანის მოქალაქე მკაცრად იცავდა კონსპირაციის წესებს და საქართველოში მკვლელობის ობიექტისა და მისი გადაადგილების მარშრუტებს ფარულად შეისწავლიდა.

დეტალები: გუშინვე ისრაელის მედიაში გავრცელდა ინფორმაცია, რომ მათი მოქალაქე, რომლის მოკვლაც უცხოეთიდან საქართველოში იგეგმებოდა, ცნობილი ბიზნესმენი, იციკ მოშეა.

  • დღეს, 16 ნოემბერს ამის შესახებ თავად ბიზნესმენმა, საქართველო-ისრაელის ბიზნეს პალატის დამფუძნებელმა და ხელმძღვანელმა ისაუბრა.
  • მოშეს თქმით, მას გუშინვე დაურეკა ისრაელის პრეზიდენტმა და მხარდაჭერა გამოუცხადა.
  • ბიზნესმენი მომხდარს ამჟამინდელ საქმიანობას უკავშირებს. მის თქმით, ის ფაქტი, რომ ისრაელს მეგობარ ქვეყნებთან აკავშირებს, ძალიან ბევრ "ანტიისრაელურ ქვეყანას" ხელს უშლის.
  • "იყო ებრაელი და ისრაელელი, ბევრი მიზეზი არ სჭირდება ჩვენს მტრებს, რომ დაგაზიანონ. ჩვენ ვმუშაობთ, რომ რეალური ისრაელი წარმოვადგინოთ, ვმუშაობთ ანტისემიტიზმის წინააღმდეგ. ეს ფაქტები, რა თქმა უნდა, ძალიან ბევრ ქვეყანას არ სიამოვნებს", — ამბობს მოშე ტვ პირველთან საუბარში.