რუსეთის თავდაცვის უწყება ამტკიცებს, რომ უკრაინა-პოლონეთის საზღვართან რუსული რაკეტები არ ჩამოვარდნილა. სამინისტროს განცხადებას პროპაგანდისტული TASS ავრცელებს.

რატომ არის მნიშვნელოვანი: NATO-ს წევრ პოლონეთში ორი რუსული რაკეტა ჩამოვარდა, შედეგად კი ორი ადამიანი დაიღუპა.

  • ინფორმაცია თავდაპირველად სხვადასხვა, მათ შორის, ადგილობრივმა მედიებმა გაავრცელეს.
  • პოლონეთის ხელისუფლებას ინფორმაცია ჯერჯერობით არ დაუდასტურებია.

დეტალები: უწყება წერს, რომ ადგილობრივი მედიისა და ოფიციალური პირების განცხადებები "მიზანმიმართული პროვოკაციაა" და ეს სიტუაციის ესკალაციას ემსახურება.

  • ამბობენ, რომ მედიაში ინციდენტის ადგილიდან გამოქვეყნებულ ფოტოებზე აღბეჭდილ ტექნიკის ნარჩენებს რუსულ რაკეტებთან კავშირი არ აქვს.

გამოხმაურებები: ლატვიის საგარეო საქმეთა მინისტრის, ედგარ რინკევიჩის განცხადებით, NATO-ს წევრი ქვეყნის ტერიტორიაზე რუსული რაკეტების ჩამოგდება კრემლის მხრიდან ძალიან საშიში ესკალაციაა.

  • ლიეტუვის პრეზიდენტმა, გიტანას ნაუსედამ პოლონეთს მტკიცე სოლიდარობა გამოუცხადა და დაწერა, რომ NATO-ს მთელი ტერიტორია დაცული უნდა იყოს.
  • მომხდარს გამოეხმაურა ესტონეთის საგარეო უწყება. მათი განცხადებით, ესტონეთი მზადაა, დაიცვას ალიანსის მთელი ტერიტორია.
  • ლუგანსკის ოლქის სამხედრო ადმინისტრაციის ხელმძღვანელი, სერგეი გაიდაიმ კი დაღუპულების გამო პოლონეთს მიუსამძიმრა და რუსეთს კიდევ ერთხელ უწოდა ტერორისტული სახელმწიფო.