საქართველოს სახალხო დამცველი, უჩა ნანუაშვილი ამბობს, რომ სამუშაოზე ადგილებზე დაშვებისა და გარდაცვალების შემთხვევებს, სახელმწიფოს მხრიდან, მკაცრი რეაგირება სჭირდება. ამის შესახებ ნანუაშვილმა განცხადება რამდენიმე წუთის წინ გაავრცელა და დღეს, თბილისში, მშენებლობაზე დასაქმებული მუშის გარდაცვალებას გამოეხმაურა.

"სახელმწიფოს ძალისხმევა მაქსიმალურად უნდა იყოს მიმართული ამ შემთხვევების პრევენციისკენ შესაბამისი მექანიზმების, მათ შორის ეფექტური შრომის ინსპექციის შექმნით," - აღნიშნა ნანუაშვილმა.

სახალხო დამცველი აღნიშნავს, რომ ბოლო წლების მანძილზე სამუშაო ადგილებზე დაშავებისა და გარდაცვალების მაჩვენებლები ზრდადია, რაც აშკარად მიუთითებს სახელმწიფოს მხრიდან სასწრაფო და ქმედითი ზომების გატარების აუცილებლობაზე. გარდა ამისა, ნანუაშვილის თქმით, მნიშვნელოვანია, სამართალდამცავებმა მსგავსი ფაქტები დროულად და ეფექტურად გამოიძიონ.