ნაზი ჯანეზაშვილის თქმით, ის საკუთარ კანდიდატურას არ ხსნის, თუმცა ადამიანის უფლებათა დაცვისა და სამოქალაქო ინტეგრაციის კომიტეტზე გასაუბრებაში მონაწილეობას არ აპირებს.

რატომ არის მნიშვნელოვანი: ჯანეზაშვილი ერთ-ერთია იმ სამ კანდიდატს შორის, რომელიც არასამთავრობო ორგანიზაციებმა სახალხო დამცველობის კანდიდატებად წარადგინეს.

  • სამუშაო ჯგუფის შეფასების მიხედვით ის მეორე ადგილზეა — 288 ქულა მოაგროვა;
  • მოქმედ სახალხო დამცველს, ნინო ლომჯარიას უფლებამოსილების ვადა 2022 წლის 8 დეკემბერს ეწურება.

დეტალები: პარლამენტში ომბუდსმენობის კანდიდატებთან გასაუბრებები მეორე კვირაა მიმდინარეობს და დღეს სრულდება. ჯანეზაშვილთან გასაუბრება კომიტეტში დღეს იყო დაგეგმილი.

  • ამბობს, რომ თავდაპირველად ინტერესი იმისა, რომ პროცესში მიმეღო მონაწილეობა, განპირობებული იყო იმით, რომ საქართველოსათვის ახლა არის ძალიან მნიშვნელოვანი ეტაპი.
  • "12-პუნქტიანი გეგმის შესრულების თვალსაზრისით და მივიჩნიე, რომ ეს შეიძლება ყოფილიყო გამონაკლისი და ხელისუფლებას მართლა შეეძლო კომპრომისის შედეგად შეერჩია პრინციპული, დამოუკიდებელი და მიუკერძოებელი კანდიდატი", — აცხადებს ის.
  • მისი თქმით, გასაუბრების პროცესმა არ დაუტოვა შთაბეჭდილება, რომ ხელისუფლება რეალურად ისახავს მიზნად შეარჩიონ კანდიდატი, რომელიც იქნება საზოგადოებისთვის მისაღები, დამოუკიდებელი, პრინციპული, კვალიფიციური.

გარდა ამისა, ჯანეზაშვილი აღნიშნავს, რომ გასაუბრების პროცესში კანდიდატებისთვის ახსნა-განმარტების მოთხოვნა იმის გამო, რომ წარსულში მათ ხელისუფლების მიმართ კრიტიკული განცხადებები აქვთ გაკეთებული, გასაუბრებების საფუძველზე კანდიდატების შერჩევას არ ემსახურება.

  • "ეს არის ერთგვარი შოუ, ამიტომ გადავწყვიტე, რომ არ მივიღო ამ პროცესში მონაწილეობა. კანონით, რეგლამენტით და პროცედურებით, რომელიც დააწესა საქართველოს პარლამენტმა, არ არის სავალდებულო გასაუბრებაზე გასვლა";
  • "არ ვაპირებ მივიდე გასაუბრებაზე სადაც ერთგვარი შოუ და სპექტაკლები იდგმება, რასაც ჩვენ მთელი ამ პერიოდის განმავლობაში ვუყურებთ და გავცე მათ მოთხოვნებს პასუხი".

ინტერესთა კონფლიქტი: სახალხო დამცველობის ერთ-ერთი კანდიდატი, პარტია გირჩის ლიდერი იაგო ხვიჩია პარლამენტში ომბუდსმენობის სხვა კანდიდატებს უსვამს კითხვებს.

  • ჯანეზაშვილი თვლის, რომ ეს ინტერესთა კონფლიქტია და ხვიჩიას თვითაცილების საკითხი უნდა დაეყენებინა.
  • "ეს არის აბსოლუტურად მიუღებელი ჩემთვის, ვინაიდან მას უნდა დაეყენებინა თვითაცილების საკითხი, ან პროცედურით უნდა ყოფილიყო გაწერილი ყველა ის დეტალი, როგორ უნდა ყოფილიყო თავიდან არიდებული ინტერესთა კონფლიქტი".