რუსეთის ყოფილმა პრეზიდენტმა საკუთარ თავს აჯობა და ამჯერად საბჭოთა კავშირის ყველაზე უსამართლო და ცუდი წესის დაბრუნების სურვილი გამოთქვა.

რატომ არის მნიშვნელოვანი: მედვედევი უკვე დიდი ხანია ალოგიკურ განცხადებებს აკეთებს, თუმცა დროთა განმავლობაში მისი შეფასებები და სურვილები უფრო და უფრო აგრესიული და არაჰუმანური ხდება.

  • ამჯერად ის აცხადებს, რომ სსრკ-ში "მოღალატეების სიკვდილით დასჯა" ყოველგვარი გამოძიებისა და გასამართლების გარეშე სამართლიანი იყო და საჭიროების შემთხვევაში რუსეთში ეს წესი უნდა დაბრუნდეს.

დეტალები: უშიშროების საბჭოს თავმჯდომარის მოადგილე ტელეგრამზე წერს, რომ რუსეთში დივერსიებს აწყობენ უცხო ქვეყნიდან ჩამოსული სტუდენტები, რომლებმაც მათთან მიიღეს განათლება.

  • ის ირონიულად ახსენებს რუსეთის მოქალაქეებსაც, რომლებიც სამხედრო გაწვევის ოფისებს და სხვა დაწესებულებებს წვავენ.
  • რა თქმა უნდა, არც "უკრაინელი ტერიროსტები" ავიწყდება, რომლებიც თითქოსდა რუსეთის ტერიტორიაზე კლავენ რუსეთის მოქალაქეებს.
  • შემდეგ კი საუბარს ასე აგრძელებს: "უბრალოდ უნდა გავიხსენოთ, რომ დიდი სამამულო ომის დროს არავინ ეთამაშებოდა დივერსანტებს, რომლებიც ნაცისტი მკვლელების ბრძანებით ახორციელებდნენ დივერსიულ სამუშაოებს. ასეთი ნაძირალასთვის მხოლოდ ერთი განაჩენი იყო — დახვრეტა სასამართლოსა და გამოძიების გარეშე. პირდაპირ დანაშაულის ადგილზე".
  • აქვე მედვედევი აღნიშნავს, რომ თუ ხარ მოღალატე, რომელმაც ასეთი დანაშაული ჩაიდინა ომის დროს, მაშინ "არც ასაკი გაქვს, არც ეროვნება და არც შენი სიცოცხლის დაცვის უფლება".

გარდა ამისა, ის ამბობს, რომ თანამედროვე რუსეთში სიკვდილით დასჯაზე მორატორიუმია გამოცხადებული და "ყველაფერი ჰუმანურადაა", აშშ-სა და კიდევ რამდენიმე ბირთვული სახელმწიფოსგან განსხვავებით.

  • ამ ქვეყნებთან რუსეთის უკეთესად წარმოჩენის მცდელობის შემდეგ კი ისევ სიკვდილით დასჯის დაბრუნებაზე საუბრობს.
  • "კიდევ ერთხელ მინდა ხაზგასმით აღვნიშნო, მოქმედი კონსტიტუციის ფარგლებშიც სიკვდილით დასჯის მორატორიუმის დაძლევა შესაძლებელია, საჭიროების შემთხვევაში, რუსეთის საკონსტიტუციო სასამართლოს სამართლებრივი პოზიციების შეცვლით. ეს არის ჩვენი ხალხის, სახელმწიფოსა და საზოგადოების ინტერესების დასაცავად საშუალებების არჩევის საკითხი", — წერს ის.