კრემლის პრესსპიკერი, დმიტრი პესკოვი ცდილობს დაგვაჯეროს, თითქოს ვლადიმერ პუტინს, რომელმაც ძალაუფლების შესანარჩუნებლად ყველაფერი იკადრა, გადაწყვეტილი არ აქვს 2024 წლის საპრეზიდენტო არჩევნებში ჩართვა.

რატომ არის მნიშვნელოვანი: პუტინი რუსეთის პრეზიდენტი 1999 წლის დეკემბერში გახდა, ბორის ელცინის პოსტიდან გადადგომის შემდეგ — არსებობდა არაერთი ეჭვი, რომ ძალაუფლების მოსაპოვებლად და ჩეჩნეთში ომის დასაწყებად მან საცხოვრებელ კორპუსებში აფეთქებები მოაწყო.

  • ამ თანამდებობაზე 4-ჯერ "აირჩიეს", 2000, 2004, 2012, 2018 წლებში — არჩევნებს თან ახლდა ოპოზიციონერების დევნა, დაკავება, გაუჩინარება და მის წინააღმდეგ მიმართული ყოველგვარი პროტესტის ჩახშობა.
  • ხელისუფლების უვადოდ შენარჩუნების მიზნით 2008 წელს ადგილი გაუცვალა პრემიერმინისტრს დმიტრი მედვედევს და 2012 წელს ისევ თავის პოსტზე დაბრუნდა — მაშინ მედვედევმა პუტინის მეორედმოსვლა ამ უკანასკნელის ჭარბი პოპულარობით და ხალხის ნებით ახსნა.
  • როცა ეს გზები ამოეწურა, კონსტიტუცია თავზე მორიგო და 2021 წელს, ხელი მოაწერა ცვლილებებს, რომლის თანახმადაც კიდევ ორჯერ შეუძლია პრეზიდენტად კენჭისყრა, თითო ჯერზე 6-6 წლიანი ვადით.
  • კანონი პოტენციურად პუტინის მმართველობის შანსს 2036 წლამდე ახანგრძლივებს.

კონტექსტი: ოპოზიციისა და ექსპერტების ნაწილი საკონსტიტუციო ცვლილებების შემუშავების ერთ-ერთ მთავარ მიზეზად პუტინის რეიტინგის ვარდნას ასახელებდა.

  • 2020 წელს მაისის გამოკითხვის შედეგად მისი რეიტინგი 59 პროცენტამდე დაეცა — რაც ბოლო 20 წლის განმავლობაში ყველაზე დაბალი მაჩვენებელი იყო.
  • უკრაინაში ომის დაწყებისა და მობილიზაციის გამოცხადების შემდეგ ეს სიტუაცია უფრო დრამატული გახდა — თუმცა ოქტომბრის მონაცემებით, პუტინის პრეზიდენტობას დადებითად მოქალაქეების 77% აფასებს.
  • საერთაშორისო მედიები და ანატილიკოსები ხშირად ამბობენ, რომ სამხედრო წარუმატებლობის გამო რუსეთში პუტინის შეცვლის სურვილი იზრდება, თუმცა ჯერ ეს მხოლოდ ვარაუდებია.

დეტალები: პუტინმა ჯერ კიდევ 2021 წლის ნოემბერში განაცხადა, რომ არ ჰქონდა მიღებული გადაწყვეტილება მომდევნო არჩევნებში მონაწილეობის შესახებ, მაგრამ ის ფაქტი, რომ არჩევის უფლება ჰქონდა, შიდა პოლიტიკურ სიტუაციას ასტაბილურებდა.

  • ამავე წლის დეკემბერში რუსული მედია RBC წყაროებზე დაყრდნობით წერდა, კრემლმა დაიწყო მზადება 2024 წლის საპრეზიდენტო არჩევნებისთვის და ამ თემაზე წინასწარი განხილვები ჯერ კიდევ ზაფხულიდან დაიწყო.