ამის შესახებ გვარამიას საქმის პროკურორმა, ზვიად გუბელაძემ მედიასთან ისაუბრა.

რატომ არის მნიშვნელოვანი: ხელისუფლებისადმი კრიტიკულად განწყობილი მთავარი არხის დამფუძნებელი, ნიკა გვარამია დღეს სააპელაციო სასამართლომ 3 წლითა და 6 თვით პატიმრობაში დატოვა.

  • ბრალდების მხარე გვარამიას რუსთავი 2-ის დირექტორობის დროს ტელეკომპანიის კუთვნილი ქონების დიდი ოდენობით გაფლანგვას, კომერციულ მოსყიდვას, ყალბი ოფიციალური დოკუმენტის დამზადებასა და გამოყენებას, ასევე, უკანონო შემოსავლის ლეგალიზაციას ედავება.
  • ამავე საქმეზე ბრალდებული ზურაბ იაშვილი სასამართლომ უდანაშაულოდ ცნო, კახა დამენიას კი მუხლი გადაუკვალიფიცირა და 50 000-ლარიანი ჯარიმა დააკისრა.

დეტალები: პროკურატურა სააპელაციო სასამართლოს გადაწყვეტილებით უკმაყოფილოა. როგორც გუბელაძე ამბობს, საქმეზე ბრალდებულ სამივე პირს პატიმრობა უნდა შეფარდებოდა.

  • ამ მოთხოვნით ბრალდების მხარე საქმეს უზენაეს სასამართლოში გაასაჩივრებს.
  • "ჩვენ მოპოვებული გვაქვს უტყუარი მტკიცებულებები, რომლებიც ადასტურებს რომ სამივე პირს ჩადენილი აქვს ბრალად წარდგენილი ქმედება და დანაშაული".
  • "გვაქვს გონივრული მოლოდინი, რომ უზენაესი სასამართლო მაინც მიიღებს სამართლიან და კანონიერ გადაწყვეტილებას და სამივე პირს დამნაშავედ ცნობს წარდგენილ ბრალდებაში", — განაცხადა გუბელაძემ.