მსახიობი თამარ მაყაშვილი ტელეკომპანია იმედის ეთერში 31 ოქტომბერს გაკეთებული განცხადების გამო ბათუმის დრამატული თეატრის მიმდინარე სპექტაკლებიდან მოიხსნა. გადაცემაში თამარ მაყაშვილი დედობის შესახებ საუბრობდა და აღნიშნა, რომ შვილების ჩაცმულობას ყოველთვის ყურადღებას აქცევდა.

"არასდროს ვაცმევდი ამ რაღაც სულელურ კაბებს, იმ დღეს გავიხედე და კატოს არ აცვია ხულელი ბავშვივით რაღაცა საშინელი ბეშუმური კაბა? ცისარტყელა, ბეშუმური. კინაღამ გული გამისკდა, ბავშვს რა ჩააცვი-მეთქი და გავერთეო..." , — განაცხადა თამარ მაყაშვილმა გადაცემაში, რასაც სოციალურ ქსელებში დიდი კრიტიკა მოჰყვა.

მოგვიანებით თამარ მაყაშვილმა იმედის ეთერით გაკეთებული განცხადების გამო ბოდიში ჯერ სოციალურ ქსელში, შემდეგ კი ქრონიკასთან ინტერვიუში მოიხადა. "გულწრფელად ვნანობ! მეტი, არ ვიცი, რა გავაკეთო? მე მაპატიეთ!", — ვკითხულობთ თამარ მაყაშვილის ფეისბუქის პოსტში.

რამდენიმე საათის წინ ბათუმის დრამატულმა თეატრმა ფეისბუქზე პოსტი გამოაქვეყნა, რომლითაც თამარ მაყაშვილის განცხადებას გაემიჯნა. განცხადებაში ვკითხულობთ, რომ თეატრის სამხატვრო ხელმძღვანელის გადაწყვეტილებით, "მსახიობი თამარ მაყაშვილი მოიხსნა მიმდინარე რეპერტუარიდან და მის მიმართ გატარდა შესაბამისი ზომები".

გარდა ამისა, ფეისბუქზე ედო ჯავახაძემ ამ თემასთან დაკავშირებით თამარ მაყაშვილთან პირადი მიმოწერის ვიდეო გაასაჯაროვა. ვიდეოდან ვიგებთ, რომ იმედის ეთერში გაჟღერებული ფრაზების გამო თამარ მაყაშვილმა თავი კიდევ ერთხელ იმართლა, აღნიშნა, რომ ბავშვები ძალიან უყვარს და მისი ნათქვამი საზოგადოებამ არასწორად გაიგო.