30 წლის გერმანელი მომღერალი კიმ პეტრასი პირველი საჯაროდ ტრანსგენდერი მომღერალი გახდა, რომლის ნამუშევარიც ბილბორდის ჩარტების ასეულის სათავეში აღმოჩნდა. თუ ჯერ კიდევ არ იცით, რა ნამუშევარზეა საუბარი, გეტყვით, რომ ეს სწორედ ის სიმღერაა, რომელსაც ბოლო კვირების განმავლობაში ყველგან მოისმენდით — სავაჭრო ცენტრიდან ტიკტოკის პოპულარულ ვიდეოებამდე.

კომპოზიცია, სახელწოდებით Unholy პეტრასისა და ცნობილი ინგლისელი მომღერლის სემ სმიტის კოლაბორაციაა. აღსანიშნავია, რომ ამ მიღწევით სმიტიც პირველი საჯაროდ არაბინარული გენდერული იდენტობის მომღერალი გახდა, რომელმაც ბილბორდის ჩარტების სათავეს მიაღწია. არაერთი მსოფლიო ჰიტის ავტორი ჯერ კიდევ 2019 წელს დაქამინგაუთდა.

პეტრასისთვის კი Unholy ასევე პირველი სიმღერაა, რომლითაც ბილბორდის ჩარტების ასეულში შევიდა. გერმანელი მომღერალი იმედოვნებს, რომ იგი "უკანასკნელი" ტრანსგენდერი შემსრულებელი არაა, რომელმაც ყველაზე პრესტიჟული მუსიკალური რეიტინგის სათავეს მიაღწია.

"არაჩვეულებრივი და ნიჭიერი ტრანსგენდერი შემსრულებლები ყოველთვის იყვნენ, მაგრამ მათ ყურადღებას არავინ აქცევდა", — ამბობს პეტრასი, — "აი, მაგალითად, SOPHIE, რომელთანაც ვმეგობრობდი კიდეც. მის გავლენას დღეს ლამის ყველა პოპულარული სიმღერა განიცდის. თუმცა, სიცოცხლეში დამსახურებული აღიარება არ მიუღია. მსგავსი შემთხვევაა ამანდა ლიერიც, რომელიც 70-80-იანებში დისკოს ნამდვილი დედოფალი იყო, მაგრამ არავინ დააფასა.

"ერთი და იგივე ამბავი მეორდება ტრანსგენდერი გოგოების თავს. ისინი გამორჩეულ მუსიკას ქმნიან, თუმცა, ყოველთვის ჩრდილში ყოფნა უწევთ, მათ მოპოვებულ აღიარებას კი სხვა ისაკუთრებს".

რაც შეეხება სიმღერას Unholy, ის 22 სექტემბერს გამოვიდა და მალევე დაიკავა წამყვანი პოზიციები სხვადასხვა ქვეყნის ჩარტებში. კომპოზიციის ნაწყვეტი სმიტმა ჯერ კიდევ აგვისტოში გაავრცელა ტიკტოკზე, რის შემდეგაც მელოდია პლატფორმაზე ვირუსულად გავრცელდა და დიდი მოლოდინი შექმნა.

სმიტის თქმით, Unholy "სხვების საიდუმლოებების მარწუხებიდან გათავისუფლებაზეა".