მალე ცნობილი ამერიკული სერიალ Friends-ის ვარსკვლავის, მეთიუ პერის, დღიური გამოვა, სახელად Friends, Lovers, and the Big Terrible Thing. როგორც ამბობენ, მსახიობი მემუარში ბევრ პირად ისტორიას იხსენებს და გულახდილად ჰყვება, თუმცა მისმა კომენტარებმა კოლეგის, კიანუ რივზის, მიმართ დიდი გაოცება გამოიწვია საზოგადოებაში.

მეთიუ პერი თავის მემუარში კიანუ რივზს ორჯერ ახსენებს და კითხულობს, რატომაა რომ "ნიჭიერი" და "ორიგინალურად მოაზროვნე" მსახიობები, როგორებიც რივერ ფენიქსი და კრის ფარლი იყვნენ, ტრაგიკულად დაიღუპნენ, კიანუ კი ჩვენს გვერდითაა.

"იმ გენიოსების სია, რომლებიც დროს წინ უსწრებდნენ, ძალიან გრძელია, იმისთვის რომ აქ მოვიყვანო, თუმცა იმას კი ვიტყვი, რომ ნებისმიერი ასეთი სიის სათავეში ჩემი კოლეგა, რივერ ფენიქსი, უნდა იყოს, რომელთან ერთადაც ფილმ A Night in the Life of Jimmy Reardon-ზე ვიმუშავე,"— წერს პერი.

მოგვიანებით კი ისევ აგრძელებს: "რივერი შინაგანად და გარეგნულად მშვენიერი ადამიანი იყო — როგორც აღმოჩნდა, ამ სამყაროსთვის ზედმეტად მშვენიერი. ყოველთვის ნამდვილად ნიჭიერ ადამიანებს მისდით ხოლმე ასე ცუდად საქმე, როგორც ჩანს. რატომაა, რომ ორიგინალურად მოაზროვნე ადამიანები, როგორებიც რივერ ფენიქსი და ჰიტ ლეჯერი იყვნენ, კვდებიან, კიანუ რივზი კი ისევ ჩვენ შორისაა? რივერი ჩემზე უკეთესი მსახიობი იყო, მაგრამ მე უფრო სასაცილო ვიყავი. ამის მიუხედავად, ჩვენს საერთო სცენებში თავი არც მე შემირცხვენია — უბრალო ამბავი არ იყო ეს, ახლა რომ წლების შემდეგ ვუბრუნდები ამ მომენტებს."

პერი კიანუ რივზს კიდევ ერთხელ ახსენებს, როცა იუმორისტ კრის ფარლის გარდაცვალებაზე წერს.

"მისი დაავადება უფრო სწრაფად პროგრესირებადი იყო, ვიდრე — ჩემი. თანაც, სიტყვა "ჰეროინი" მე შიშის ზარს მცემდა, მას კი — არა. ჯენიფერ ენისტონის გამოსაცვლელ ოთახში კედელი მუშტით შევანგრიე, როცა ფარლის ამბავი გავიგე. კიანუ რივზი ისევ ჩვენ შორისაა! ორი კვირის შემდეგ რაც კრისი გარდაიცვალა, Almost Heroes-ის პიარზე უნდა მეზრუნა. საჯაროდ მომიწია მესაუბრა მის სიკვდილზე, რომელიც ნარკოტიკებმა და ალკოჰოლმა გამოიწვია. ამ დროს მე თვითონაც ნარკოტიკული საშუალების ზემოქმედების ქვეშ ვიყავი."

Friends, Lovers and the Big Terrible Thing-ის წინასწარი შეკვეთა უკვე შესაძლებელია. წიგნი ოფიციალურად ხელმისაწვდომი 1 ნოემბრიდან იქნება. მემუარი ასევე მოიცავს ამბებს იმის შესახებ, თუ როგორ დახარჯა პერიმ დაახლოებით $9 მილიონი, რათა ალკოჰოლიზმისგან თავი დაეღწია. მსახიობი ასევე იხსენებს ფაქტს, როცა კინაღამ მოკვდა 2018 წელს ოპიუმის ზედმეტი დოზისაგან.

მოგვიანებით, PEOPLE-თან ინტერვიუში, პერიმ განაცხადა, რომ მან შემთხვევითობის პრინციპით აირჩია კიანუს სახელი.

"კიანუს დიდი ფანი ვარ. მისი სახელი შემთხვევითობის პრინციპით ავირჩიე. ეს შეცდომა იყო. ბოდიშს ვიხდი. ჩემი საკუთარი სახელი უნდა გამომეყენებინა მის ნაცვლად."