პროკურატურის განცხადებიდან ვიგებთ, რომ მათ ბრალი წარედგინათ იმ მუხლებით, რაც შსს-მ დაკავებისას დაასახელა. უწყება აღკვეთის ღონისძიების სახით პატიმრობის შეფარდებას მოითხოვს.

დეტალები: მათივე განცხადებით, გამოძიების საწყის ეტაპზე ბრალდება წარედგინათ:

  • თბილისის მერიის გარემოს დაცვის სამსახურის უფროსის მოადგილეს;
  • გრინსერვის+-ის დირექტორს, სამუშაოთამწარმოებელს და 1 თანამშრომელს;
  • გრინსერვისის ქვეკონტრაქტორი ფირმის ნიუმეტალ დიზაინის წარმომადგენელს, მათ დაქირავებულ 2 ხელოსანს;
  • მშენექსპერტის დირექტორსა და ექსპერტს.

პროკურატურაში ბრიფინგზე ფაქტობრივად ის განცხადება წაიკითხეს, რაც შსს-გან მოვისმინეთ და დამატებით გაასაჯაროეს ვიდეო, რომელშიც ჩანს, როგორ მუშაობენ ხელოსნები შადრევნის რეაბილიტაციაზე. აჩვენეს ფოტომასალაც.

  • "ეს გახლავთ ძრავის დასაფარებელი ცხაური და ხედავთ, როგორ არის მოყოლილი მაღალი ძაბვის ელექტროკაბელი ცხაურს შორის, რომელშიც 380 ვოლტი დენი გაედინება. ეს უფრო ახლო კადრია, ამ კაბელზე არის საუბარი და ის ცხაური, რომელშიც მოყოლილი არის", — თქვა პროკურორმა, როცა ამ ფოტოებს წარადგენდა.

ფოტო: კადრი პროკურატურის ვიდეოდან

გარდა ამისა, უწყებამ გაასაჯაროა მიღება-ჩაბარების აქტების სქრინები.

  • მათ თქმით, პირველ ნაწილში არ არის აღნიშნული, რომ სამუშაოები შეესაბამება სამშენებლო ნორმებსა და წესებს, ხოლო მეორე, გაყალბებულ პროექტში, რომელიც მერიაში წარადგინეს, ეს ჩანაწერი გაჩნდა.

ფოტო: კადრი პროკურატურის ვიდეოდან

ჟურნალისტების კითხვების პასუხად პროკურატურაში განაცხადეს, რომ დანიშნულია ექსპერტიზები, რომელიც დაადგენს, იყო თუ არა პროექტი და შესრულებული სამუშაოები შესაბამისობაში მოქმედ კანონმდებლობასთან და უსაფრთხოების ნორმებთან.

რატომ არის მნიშვნელოვანი: 13 ოქტომბერს ვაკის პარკის შადრევანში ჩასულ ბავშვებს დენმა დაარტყა. 13 წლის მოზარდი გარდაიცვალა, ხოლო 2 ბავშვი დაშავდა.

  • შადრევანი მერიამ წინა დღეს, 12 ოქტომბერს ოფიციალურად გახსნა — სარეაბილიტაციო სამუშაოებს კომპანია გრინსერვისი+ ასრულებდა.
  • ოფიციალურად დოკუმენტაციაში წერია, რომ გრინსერვისი+-მა ჩააბარა, ხოლო მერიის გარემოს დაცვის საქალაქო სამსახურმა მიიღო მშენექსპერტის ინსპექტირების ანგარიშით დადასტურებული შადრევნისა და კასკადის სარეაბილიტაციო სამუშაოები.
  • თავის მხრივ, მშენექსპერტი ინსპექტირების შუალედურ ანგარიშში წერს, რომ სამუშაოები შესრულებულია საპროექტო-სახარჯთაღრიცხვო დოკუმენტაციის შესაბამისად და შესაბამისობაშია საქართველოში მოქმედ სამშენებლო ნორმებთან, თუმცა თუმცა არ საუბრობს უსაფრთხოების საკითხზე.
  • მერიის წარმომადგენელი და გრინსერვისის დირექტორიც ამტკიცებდნენ, რომ შადრევნის უსაფრთხოება შემოწმებული იყო.

რას ამბობს შსს: გამოძიების ვერსიით, "შადრევანზე დასრულებული სამუშაოების მიუხედავად", მერიის გარემოს დაცვის საქალაქო სამსახურის მოადგილემ, შპს გრინსერვისი+-ის მენეჯერს სთხოვა, რომ შადრევანში მდებარე ელექტროძრავიდან გამომავალი შავი ფერის წყლის მილები შეეფუთათ უჟანგავი თეთრი ფერის კონსტრუქციით.

  • მათივე თქმით, ამ პირმა აცნობა ლაშა ფურცხვანიძეს, რომელმაც დაავალა მას, ამ სამუშაოს შესრულება შეეკვეთათ ქვეკონტრაქტორი ფირმის, ნიუ მეტალ დიზაინის წარმომადგენლისთვის, რომელმაც, თავის მხრივ, სამუშაოების შესრულება დაავალა კერძო ელექტროშემდუღებლებს.
  • ხოლო შესრულებული სამუშაოების ზედამხედველობა და კონტროლი დაევალა გრინსერვისის სამუშაოთმწარმოებელს.

დარღვევები: უწყებაში ამბობენ, რომ 2022 წლის 22 სექტემბერს ელექტროშემდუღებლებმა სამუშაოს წარმოების დროს დაარღვიეს უსაფრთხოების ნორმები, კერძოდ:

  • "წყლის მილებზე უჟანგავი კონსტრუქციის მორგების მიზნით მოხსნეს ელექტროძრავის შესაფუთი ლითონის ცხაური, რომლის უკან დამაგრებისას ბეტონის ზედაპირსა და ცხაურს შორის მოაყოლეს ელექტროსადენი, რის შედეგადაც დაზიანდა სადენის იზოლაცია".
  • მათივე თქმით, ლაშა ფურცხვანიძემ შესრულებული სამუშაო შესაბამისი ინსპექტირების ჩატარების გარეშე წარუდგინა მერიის საქალაქო სამსახურს, ხოლო მერიის გარემოს დაცვის სამსახურის უფროსის მოადგილემ მიიღო შესაბამისი ინსპექტირების გარეშე.
  • უწყებაში ამბობენ იმასაც, რომ ქვეკონტრაქტორის ფირმის წარმომადგენელმაც არ გადაამოწმა დაქირავებული ელექტროშემდუღებლების მიერ შესრულებული სამუშაო.
  • ხოლო გრინსერვისის საქმეთამწარმოებელმა არ გაუწია შესაბამისი კონტროლი ამ საქმიანობას.

ინსპექტირების ანგარიში: უწყებაში განმარტავენ, რომ გრინსერვის +-მა, თბილისის მერიის გარემოს დაცვის საქალაქო სამსახურთან მიღება-ჩაბარების აქტის გაფორმებისთვის სავალდებულო, შესაბამისი დასკვნის მომზადების მიზნით, ხელშეკრულება გააფორმა შპს მშენექსპერტთან.

  • მათი თქმით, მშენექსპერტისდირექტორმა და ინსპექტორმა მოახდინეს ფაქტობრივად შესრულებული სამუშაოების მოცულობის ღირებულების ინსპექტირება, რომლის პროექტი მიაწოდეს გრინსერვის +-ის თანამშრომელს, მაგრამ დასკვნის შინაარსი არ აკმაყოფილებდა თბილისის მერიისა და გრინსერვის +-ს შორის გაფორმებულ ხელშეკრულებაში მითითებულ სავალდებულო მოთხოვნებს.
  • მათივე თქმით, კომპანიის თანამშრომელმა, დ.კ.-მ, მათ ფირმასთან სამომავლო საქმიანი ურთიერთობის გაგრძელების სანაცვლოდ, დაიყოლია მშენექსპერტის დირექტორი და ინსპექტორი, რომ დასკვნაში ჩაეწერათ, თითქოს შეისწავლეს ჩატარებული სამუშაოების შესაბამისობა საქართველოში მოქმედ სამშენებლო ნორმებსა და წესებთან.
  • "2022 წლის 25 აგვისტოს, დ.თ.-მ და ნ. ქ.-მ შეადგინეს ყალბი ოფიციალური დოკუმენტი — ინსპექტირების ანგარიში, რომლის დასკვნით ნაწილში ასევე დააფიქსირეს, რომ შესრულებული სამუშაოები შეესაბამება საქართველოში მოქმედ სამშენებლო ნორმებსა და წესებს", — აცხადებს უწყება.
  • აღნიშნავენ იმასაც, რომ ეს ყალბი დასკვნა ლაშა ფურცხვანიძემ წარადგინა თბილისის მერიის გარემოს დაცვის საქალაქო სამსახურში, "რაც გახდა მხარეებს შორის მიღება-ჩაბარების აქტის გაფორმების საფუძველი".