ნავთობპროდუქტების იმპორტმა 2022 წლის იანვარ-სექტემბერში $1.022 მლრდ-ს მიაღწია.

რატომ არის ეს მნიშვნელოვანი: $1 მილიარდიანი ზღვარი რეკორდია და ის ნავთობის საწვავს აქამდე მთელი წლის განმავლობაშიც კი არასდროს გადაულახავს.

  • ენერგომატარებლების, განსაკუთრებით კი საწვავის ღირებულება, სხვა პროდუქციის ფასებზეც აისახება.
  • ტვირთის ტრანსპორტირების გაძვირების გამო, ფასები როგორც ადგილობრივ, ასევე იმპორტირებულ პროდუქციაზეც მატულობს;
  • არსებული ორნიშნა ინფლაციის ერთ-ერთი უმთავრესი მიზეზი საწვავის გაძვირებაა.

იმპორტის ზრდის მიზეზები: 2020 წელს, მსოფლიო ლოქდაუნის გამო შემცირებული მოთხოვნის შედეგად, ნავთობის ფასი მკვეთრად შემცირდა, შემდეგ კი ასევე მკვეთრად გაიზარდა.

  • პანდემიის პირველ წელს საქართველომ სულ $498 მლნ-ის ნავთობპროდუქტების იმპორტი განახორციელა;
  • მომდევნო 2021 წელს ფასების მატებასთან ერთად იმპორტის საერთო მოცულობა $823 მლნ-მდე გაიზარდა;
  • 2022 წლის პირველ 9 თვეში კი — $1.022 მლრდ-მდე.

რუსეთზე დამოკიდებულების ზრდა: 2022 წელს რუსეთი საერთაშორისო სანქციების გამო, იძულებული გახდა ნავთობზე და ნავთობპროდუქტებზე ფასი შეემცირებინა.

  • მოგების ზრდის მიზნით, საქართველოში ნავთობიმპორტიორებმა რუსეთიდან იმპორტირებული საწვავის წვლილი 16.6%-დან 42%-მდე გაზარდეს.