ნატოს საპარლამენტო ასამბლეის პრეზიდენტი, პაოლო ალი ამბობს, რომ საქართველოსთვის მაპის მინიჭების საკითხზე მსჯელობა გაგრძელდება. ამის შესახებ ალიმ ტელეკომპანია რუსთავი 2-ის ჟურნალისტის კითხვაზე უპასუხა. ჟურნალისტი დაინტერესდა შეუძლია თუ არა საქართველოს ნატოს წევრი მაპის გარეშე გახდეს.

"მაპი არის ინსტრუმენტი. ეს არის პოლიტიკური ხედვა. მაპი კონკრეტული საშუალებაა, რომ პროცესი დაიწყოს, მაგრამ სხვა ქვეყნების შემთხვევაშიც ბჭობენ მაპთან დაკავშირებით და საქართველოს სიტუაციაში, ნებისმიერ შემთხვევაში, ეს არის ძალიან კარგი საშუალება. მაპი არის ერთ-ერთი გადაჭრის გზა ნატოს მხრიდან და ჩვენ გავაგრძელებთ ამაზე მსჯელობას," - აღნიშნა ალიმ, რომლიც ფიქრობს, რომ საქართველო ნატოს წევრი გახდება.

"ეს ბევრჯერ ითქვა ბუქარესტში 2008 წელს და ეს ძალაში რჩება. რაც შეეხება რეგიონში სიტუაციას, ჩვენ ვისაუბრეთ ბატონ თავმჯდომარესთან და ჩვენ გვესმის რუსეთის აგრესიული ქცევის, ჩვენ აბსოლუტურად მხარს ვუჭერთ საქართველოს ტერიტორიულ მთლიანობას, ისევე, როგორც უკრაინის," - თქვა ნატოს საპარლამენტო ასამბლეის სადამკვირვებლო მისიის პრეზიდენტმა.

დღეიდან 29 მაისის ჩათვლით, თბილისი ნატოს საპარლამენტო ასამბლეის საგაზაფხულო სესიას მასპინძლობს. ნატოს საპარლამენტო ასამბლეის პრეზიდენტმა, პაოლო ალიმ საქართველოში ჩამოსვლისას ჟურნალისტებთან განაცხადა, რომ ისინი საქართველოს ძალიან მნიშვნელოვან პარტნიორად მიიჩნევენ რეგიონში.