ინფორმაციას ამის შესახებ პროკურატურა ავრცელებს.

რატომ არის მნიშვნელოვანი: გოგაშვილი ბრალდებულია სამსახურებრივი უფლებამოსილების გადამეტების, პერსონალური მონაცემების ხელყოფისა და ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვაზე.

  • უწყების განცხადებით, ეს გამოიხატება შემდეგში: "ბრალდებულმა სახელმწიფო უსაფრთხოების სამსახურიდან უკანონოდ გატანილი საიდუმლო მასალები შეინახა საკუთარ სახლში, რითიც შექმნა სახელმწიფო საიდუმლოების გახმაურების საფრთხე, ხოლო ინფორმაციის ნაწილი — პერსონალური მონაცემები მისი მონაწილეობით გავრცელდა საჯარო სივრცეში, რამაც მნიშვნელოვანი ზიანი გამოიწვია".
  • მათივე თქმით, გარდა ამისა, ბრალდებულმა მართლსაწინააღმდეგოდ შეიძინა და ინახავდა ორ დაურეგისტრირებელ და ნათესავის სახელზე რეგისტრირებულ სამ ცეცხლსასროლ იარაღს და საბრძოლო მასალას.
  • ახლა კი პროკურატურის განცხადებით, გოგაშვილს სახელმწიფო საიდუმლოების განზრახ გახმაურების და პირადი ცხოვრების საიდუმლოს ხელყოფის ფაქტებზე ახალი ბრალდება წარედგინა.

დეტალები: უწყების განმარტებით, გამოძიებით გამოიკვეთა, რომ თანამდებობაზე მუშაობის დროს გოგაშვილს ხელი მიუწვდებოდა, როგორც სახელმწიფო საიდუმლოების შემცველ ინფორმაციაზე, ასევე პირად და პერსონალურ მონაცემებზე, რომლებიც უფლებამოსილების გადამეტებით, პირადი მიზნებისთვის უკანონოდ გაიტანა სამსახურიდან და ინახავდა სახლში.

  • მათი თქმით, უკანონოდ გატანილი საიდუმლო ინფორმაციის ნაწილი გოგაშვილმა გადასცა სხვა პირს, რითაც სახელმწიფო საიდუმლოება განზრახ გაახმაურა.
  • მათივე მტკიცებით, გოგაშვილს უკანონოდ ჰქონდა მოპოვებული არაერთი პირის პირადი ცხოვრების საიდუმლოს ამსახველი ვიდეომასალა, რომლებსაც უკანონოდ ინახავდა მის კუთვნილ ელექტრონულ მოწყობილობებში.
  • წარდგენილი ბრალდებები სასჯელის სახედ და ზომად ითვალისწინებს აღკვეთას ოთხიდან შვიდ წლამდე ვადით.

არქივიდან: გოგაშვილი 16 ივლისს სპეცოპერაციით დააკავეს. მისი თქმით, ეს წესების დაცვით არ მომხდარა, განჩინება მხოლოდ ჩხრეკაზე იყო გაცემული.

  • დაკავების შემდეგ სუს-ის ყოფილმა მაღალჩინოსანმა არაერთი წერილი გაავრცელა — საუბრობდა ხელისუფლების ჩადენილ სავარაუდო დანაშაულებზე და ამბობდა, რომ თანამდებობაზე ყოფნის პერიოდში ბიძინა ივანიშვილისგან უკანონო დავალებებს იღებდა.
  • გარდა ამისა, მან NGO-ებს გადასცა დოკუმენტები, რომლებიც მისი თქმით, არჩევნებში სუს-ის ჩართულობას და ამომრჩევლის დაშინებას ასახავს.