სევერუს სნეიპი, ჰარი პოტერისა არ იყოს, თანამედროვე ლიტერატურისა და კინოს ერთ-ერთი ყველაზე ცნობილი გმირია. ფილმის ფრენჩაიზში შხამ-წამლების იდუმალი, მუდამ მოღუშული პროფესორის როლს ბრიტანელი მსახიობი ალან რიკმანი ასრულებდა, რომელიც, სამწუხაროდ, 2016 წელს სიმსივნით გარდაიცვალა.

მსახიობს 2005 წელს დაუსვეს პროსტატის კიბოს დიაგნოზი და მალევე ამერიკის შეერთებულ შტატებში ოპერაციაც ჩაუტარდა. მიუხედავად თავისი ჯანმრთელობის მდგომარეობისა, ალან რიკმანს სევერუს სნეიპის როლზე უარი მაინც არ უთქვამს და ფრენჩაიზის მეხუთე ფილმზე, ჰარი პოტერი და ფენიქსის ორდერი, მუშაობა კვლავინდებურად გააგრძელა. ამ გადაწყვეტილების მიზეზს კი მის დღიურში ვკითხულობთ: "ბოლომდე მიიყვანე. ეს შენი ისტორიაა."

ფოტო: Warner Bros.

2007 წლის დღიურის ჩანაწერებში, რომელიც ახლახანს Guardian-მა გამოაქვეყნა, რიკმანი ასევე აღნიშნავს, რომ სნეიპისა და ჰარის დედის, ლილის, სიყვარულის შესახებ მან ჯოან როულინგისგან ყოველთვის იცოდა — ბევრად უფრო ადრე, ვიდრე ამას დანარჩენი მსახიობები ანდა წიგნის მკითხველები თუ ფილმის მაყურებლები გაიგებდნენ.

რიკმანმა დღიურში როულონგთან პირველი შეხვედრაც ახსენა და დაწერა, რომ სნეიპის გმირთან დაკავშირებულ ამბებში მწერლის მესაიდუმლედ იქცა.

"მასთან საუბარი ისეთ შთაბეჭდილებას მიქმნის, თითქოს ის ამ ისტორიებს კი არ თხზავს, არამედ მათში ცხოვრობს", — თქვა მსახიობმა როულინგზე 2000 წელს გაკეთებულ ჩანაწერებში.

როგორც 2022 წლის ივნისში გახდა ცნობილი, ოქტომბერში Henry Holt and Company გამოუშვებს რიკმანის ხელით ნაწერ დღიურებს Madly Deeply: The Diaries of Alan Rickman (გიჟურად სიღრმისეულად: ალან რიკმანის დღიურები).

ალან რიკმანს უამრავი შთამბეჭდავი როლი აქვს შესრულებული სხვადასხვა ჟანრში, მას უთამაშია ისეთ ფილმებში, როგორიცაა Die Hard, Truly, Madly, Deeply, Galaxy Quest, The Hitchhiker’s Guide to the Galaxy, Sweeney Todd: The Demon Barber of Fleet Street, Love Actually, Robin Hood: Prince of Thieves, თუმცა მსოფლიო საზოგადოებას თავი მაინც სევერუს სნეიპის საკულტო როლით დაამახსოვრა — ერთ-ერთი ყველაზე მამაცი კაცის, რომელსაც ჰარი პოტერი იცნობდა.