შინაგან საქმეთა მინისტრი სუს-ის უფროსის ყოფილი მოადგილის, მორიგ წერილს ეხმაურება, რომელშიც გოგაშვილი საუბრობს, ვის უსმენდნენ და როგორ დგებოდა სუს-ის კრებსები.

რატომ არის მნიშვნელოვანი: გოგაშვილი წერილში დეტალურად აღწერს ოპერატიული ტექნიკური დეპარტამენტის (ოტო) მუშაობის მექანიზმს და იმას თუ როგორ ხვდებოდა კრებსები ივანიშვილისა და მმართველი პარტიის სხვა წევრების ხელში.

• ამბობს, რომ ოტო ე.წ VIP პერსონების საუბრებს ივანიშვილს უგროვებდა და ყოველდღიურად აწვდიდა.
• წერს, რომ მის პერიოდში ოტოდან კრებსებს ბექა მამარდაშვილი უგზავნიდა, მათ სპეციალურ ჯგუფს ამუშავებინებდა და ყოველ მეორე დღეს თანამშრომელს პარტიაში, ასევე, ივანიშვილთან, კობახიძესთან და პრემიერმინისტრთან ატანდა, გომელაური კი სრულ "პატაკს" იღებდა.
• მისივე თქმით, ივანიშვილი მოსმენებისთვის სუს-თან ერთად, იყენებს შსს-ს, თავდაცვის სამინისტროს, კრიმინალურ პოლიციას, დაზვერვასა და პროკურატურას.

რას ამბობს გომელაური: ის გოგაშვილის ახალ ბრალდებებს სიცრუესა და აბსურდს უწოდებს და აცხადებს, რომ ივანიშვილი მას ვერაფერს დაავალებდა, რადგან არ იცნობდა.

• "მეორეც, რა უნდა დაევალებინა, მე არაფერს არ მავალებდა".
• ასევე, ამბობს, რომ მოსმენებს უწყებები, მათ შორის შსს, თავდაცვის სამინისტრო, პროკურატურა, მხოლოდ კანონიერად ხორციელდება.
• "ეს არის არა მარტო კრებსები, ოპერატიული მასალაა უამრავი, რომელიც მოაქვს ე.წ. აგენტს [...] მე რომ დავჯდე და რა ოპერატიული მასალაც შემოდის ვიკითხო... მინიმუმ სამი გომელაური უნდა იყოს".

დეტალები: რაც შეეხება ბექა მამარდაშვილს, რომელზეც გოგაშვილმა წერილში თქვა, რომ თანამდებობაზე ყოფნის პერიოდში კრებსებს ივანიშვილთან მას ატანდა, გომელაური ამბობს, რომ იცნობს.

• მისი თქმით, მამარდაშვილი ერთ-ერთ დეპარტამენტში მოადგილის თანამდებობაზე მუშაობდა.
• ასევე, აღნიშნავს, რომ მას მოსმენებთან შეხება არ ჰქონია, უბრალოდ ერთ-ერთი ძლიერი პროგრამისტია, რომელიც მომსახურების სააგენტოს კამერების განახლებასა და სხვა საკითხებში ეხმარებოდა.
• კითხვაზე, თუ სადაა ახლა, გომელაურმა თქვა: "არ ვიცი, სამსახურიდან წავიდა, მე რომ წამოვედი მალე წამოვიდა, კერძო სექტორში თუ არ ვცდები".

რას ამბობს სხვა ბრალდებებზე: უარყოფს გოგაშვილის წინა ბრალდებებსაც, კერძოდ იმას, რომ 2016 წელს ვლადიკავკაზში იყო და FSB-ის აგენტებს შეხვდა, სიცრუეს უწოდებს.

• მისი თქმით, ვლადიკავკაზში არ ყოფილა, თუმცა მინსკში ძალიან ბევრჯერაა ნამყოფი და "ალბათ, 5-6 ვიზიტი აქვს".
• "[მინსკში] იყო 100 წლისთავი, როდესაც იქ ჩამოსულები იყვნენ ამერიკელებიც, ბრიტანელებიც, ფრანგებიც, რუსებიც, გერმანელებიც, როცა მიულოცეს ბელარუსის უსაფრთხოების შექმნის დღეს".
• ამბობს, რომ სხვებთან ერთად, იქ რუსეთის ხელმძღვანელობაც იყო ჩასული.
• "ზოგი იყო პირველი პირი, ზოგი იყო მეორე პირი, იქ შეიძლება, მასაში, ჩვეულებრივად ყველა იყო. შეხვედრა პირისპირ? არასდროს არ მქონია ვერ დაიდება ვერასდროს", — ამბობს ის.

გარდა ამისა, მცხეთაში FSB-ს გენერლების მასპინძლობასა და კონტრაბანდული ტვირთი დასმულ კითხვაზე, გომელაური ამბობს, რომ გოგაშვილის განცხადება "ზღაპარია".

არასამთავრობო ორგანიზაციების განცხადებით, თუ გოგაშვილის მიერ გამოქვეყნებული მასალა დადასტურდება, ეს სახელმწიფოს წინააღმდეგ მიმართულ ან/და სამოხელეო დანაშაულზე, რუსეთთან ხელისუფლების მჭიდრო კავშირებსა და ანტიდასავლურ კურსზე მიუთითებს.

• მათი თქმით, ეს საფრთხეს უქმნის საქართველოს ეროვნულ ინტერესებს, მის ევროპულ და ევროატლანტიკურ მისწრაფებებს და ეწინააღმდეგება ქვეყნის კონსტიტუციას.

ამბობენ, რომ გაჟღერებული ინფორმაცია სრულყოფილ და სიღრმისეულ გამოძიებას საჭიროებს.

• ასევე, მიუთითებენ, რომ წლების განმავლობაში გახმაურებულ საქმეებზე საჯაროდ არსებული ინფორმაცია პროკურატურის არაეფექტიან და რიგ შემთხვევაში, შერჩევით რეაგირებაზე აჩენს კითხვებს.

• საკითხის პოლიტიკური მნიშვნელობიდან გამომდინარე, მიგვაჩნია, რომ პარლამენტში უნდა შეიქმნას დროებითი საგამოძიებო კომისია, რომელიც სიუჟეტში აღწერილ გარემოებებს სათანადოდ გამოიძიებს.