გიფიქრიათ იმაზე, რომ დასვენება სანტასაც სჭირდება? არა, შვებულებას ან უქმეებს კი არ ვგულისხმობთ, არამედ — უკვე ვალმოხდილი პენსიაზე გასვლას.

თქვენ თუ არა, ამაზე ნამდვილად დაფიქრდნენ დისნეიში და გადაწყვიტეს, მინისერიალიც გადაეღოთ. სერიალს სახელად სანტა კლაუსები (The Santa Clauses) ერქმევა და მაყურებელი მას 16 ნოემბრიდან იხილავს.

"შობისა და ჩემი ოჯახის სასიკეთოდ, სანტა კლაუსმა გადაწყვიტა, პენსიაზე გავიდეს", — ამბობს მთავარი პერსონაჟი სერიალის პირველ ტრეილერში, რომელიც ცოტა ხნის წინ გავრცელდა. ამ განცხადებას მაშინვე მოჰყვება ელფების ტირილი და აღშფოთებული რეაქცია.

თუმცა, სანტას სიტყვის წინ ვინ წავა — ამიტომ, 65-ე დაბადების დღის შემდეგ, იგი თავადვე იწყებს თავისი შემცვლელის მოძებნას და, როგორც ვიდეოში ვხედავთ, გასაუბრებაზე კანდიდატებს "ჰოუ-ჰოუ-ჰოუს" თქმასაც დაჟინებით სთხოვს.

სანტა კლაუსები 1994-ის შემდეგ გამოსულ საშობაო ფილმების ტრილოგიას ეფუძნება. ეს ფილმების სერია მალევე იქცა ფრენჩაიზად და სწორედ მისი ნაწილია დისნეის ახალი კომედიური სერიალიც.

ამ მინისერიალში კი ბევრ საინტერესო შეკითხვას გაეცემა პასუხი; მაგალითად, რატომ არ აქვს მისის კლაუსს სახელი, საიდან მოდის სანტა და თუკი არიან ბავშვები ჩრდილოეთ პოლუსზე.

სანტა კლაუსების რეჟისორი ჯეისონ უაინერია, მთავარ როლებს კი სერიალში ტიმ ალენი, ელიზაბეთ მიჩელი და მატილდა ლოულერი ასრულებენ.

როგორც ვთქვით, პრემიერა Disney+-ზე 16 ნოემბერსაა დაგეგმილი. ამ დღეს მაყურებელი პირველ ორ სერიას ერთად იხილავს.