ჩემი ვაგინის გამო ყოველთვის ნაკლებს გადამიხდიან — ჯენიფერ ლოურენსი ჰოლივუდში არათანაბარ ანაზღაურებაზე საუბრობს

ჰოლივუდში არათანაბარ ანაზღაურებაზე და გენდერული ნიშნით უპირატესობის მინიჭებაზე არაერთხელ უსაუბრიათ ღიად და, როგორც ჩანს, მსოფლიო კინოინდუსტრიის ცენტრში ეს პრობლემა კვლავაც რჩება. ამჯერად, საკითხს ოსკაროსანი კინოვარსკვლავი, ჯენიფერ ლოურენსი, შეეხო.

მსახიობი, რომელმაც გასულ წელს აკადემიის ჯილდოზე წარდგენილ ფილმში, Don't Look Up, მიიღო მონაწილეობდა, წინათ ამბობდა, რომ მისი გასამრჯელოთი კმაყოფილი იყო. თუმცა, ამის მიუხედავად, მას ფილმში მონაწილე ლეონარდო დიკაპრიოს ანაზღაურებაზე $5 მილიონით ნაკლები მიუღია. ლოურენსი იხსენებს, რომ მას მსგავსად მოექცნენ 2013 წელს გამოსულ ფილმშიც, American Hustle — მსახიობმა ქალმა თავის კოლეგა კაცებზე ნაკლები ანაზღაურება მიიღო.

"მნიშვნელობა არ აქვს, როგორ ვირჯები", — ამბობს ლოურენსი, — "ჩემი ვაგინის გამო იმდენს მაინც არასდროს გადამიხდიან, რამდენსაც კაცს".

ლოურენსი ასევე შეეხო ამერიკულ პოლიტიკაში სექსიზმისა და მიზოგინიის პრობლემას და ისაუბრა ქვეყანაში აბორტის რამდენიმე თვის წინ გაუქმებულ უფლებაზეც.

2021 წლის აგვისტოში გავრცელებული ინფორმაციის მიხედვით, დიკაპრიომ Don't Look Up-ში მონაწილეობისთვის $30 მილიონი მიიღო, ლოურენსს კი $25 მილიონი გადაუხადეს. უფრო თვალსაჩინო შედარებისთვის — დიკაპრიოს გამომუშავებელ ყოველ ერთ დოლარზე ლოურენსმა 83 ცენტი მიიღო.

აღსანიშნავია, რომ გენდერული ნიშნით უპირატესობის მინიჭებისა და არათანაბარი ანაზღაურების პრობლემას ქალები არა მხოლოდ ჰოლივუდში, არამედ სხვადასხვა სამუშაო ადგილას ისევ აწყდებიან. მსოფლიოში 2,4 მილიარდ ქალს თანაბარი ეკონომიკური შესაძლებლობებით სარგებლობა არ შეუძლია, 178 ქვეყანაში კი ქალების ნაწილს სრულფასოვანი ეკონომიკური საქმიანობა კანონით ეზღუდება. ამასთან, UNDP-ის მონაცემებით, ქალები გამოიმუშავებენ 0,77 ცენტს კაცების მიერ იმავე სამუშაოზე გამომუშავებული 1 დოლარის საპირწონედ.