პარლამენტის თავმჯდომარე ვადამდელი არჩევნების მოთხოვნას რადიკალიზაციისკენ მიმართულ ქმედებას უწოდებს.

რატომ არის მნიშვნელოვანი: ვადამდელი არჩევნების დანიშვნის აუცილებლობაზე ენმ-ის თავმჯდომარემ, ნიკა მელიამ დღევანდელ ბრიფინგზე ისაუბრა/

  • მისი თქმით, ენმ ვადამდელის მისაღწევად მრავალფეროვან პოლიტიკურ აქტივობებს და სხვადასხვა სახისა და ფორმის საპროტესტო ღონისძიებებს გამართავს, თუმცა მელიას კონკრეტული თარიღი არ დაუსახელებია.

დეტალები: პაპუაშვილის მტკიცებით, საქართველოში მთავარი გამოწვევა არა პოლარიზაცია, არამედ "ოპოზიციის ნაწილის რადიკალიზაციაა", რაც პოლარიზაციას იწვევს.

  • მისი თქმით, ოპოზიციის ქმედებები რადიკალური და წინასწარგანჭვრეტადია.
  • პარლამენტის თავმჯდომარეს მაგალითად 24 ივნისის აქცია მოჰყავს და ამბობს, რომ კანდიდატის სტატუსზე ევროპული საბჭოს გადაწყვეტილების შემდეგ პარლამენტს დეპოლარიზაციისკენ ნაბიჯის გადადგმის ნაცვლად, "ულტიმატუმი წაუყენეს".
  • "ესეც იგივე განცხადებაა. ამ მთლიან განცხადებაში რომელი აბზაცი, რომელი წინადადება გულისხმობს თავის თავში დეპოლარიზაციას, ეს არის პირდაპირ რადიკალიზაციისკენ მიმართული ქმედება ".

პაპუაშვილი ამბობს, რომ ოპოზიციის ეს ნაწილი საკუთარ შეცდომებზეც ვერ სწავლობს და მათ საზოგადოების არანაირი მხარდაჭერა არ აქვთ.

  • მისი თქმით, ერთადერთი, რასაც ამ მოთხოვნით მიაღწევენ არის ის, რომ უფრო მეტად მარგინალიზდებიან და საერთაშორისო საზოგადოებაც "დაინახავს მათ სახეს".

ვადამდელი არჩევნების საკითხს თბილისის მერი, კახა კალაძეც გამოეხმაურა და მას "დიდი აბსურდი და სისულელე" უწოდა.