საქართველოში, სტუდენტთა კიბერ უსაფრთხოების პირველ ფესტივალზე, ისეთი საკითხები განიხილეს, როგორიცაა კიბერ უსაფრთხოების სტრატეგია, პოლიტიკა, მისი განვითარება და მთავარი გამოწვევები, ასევე, ჰიბრიდული ომები, კიბერ უსაფრთხოების ელემენტები ბიზნესში და სხვა. ფესტივალს საქართველოს უნივერსიტეტმა უმასპინძლა.

საქართველოს ატლანტიკური საბჭოს ვიცე-პრეზიდენტის ბათუ ქუთელიას თქმით, დღეს ვირტუალურ სივრცეში მესამე მსოფლიო ომი მიმდინარეობს:

"დღევანდელ დღემდე ცივილიზებული სამყარო მეტნაკლებად მშვიდად ცხოვრობდა, არსებობდა საფრთხეები, თუმცა არსებობდა მათი შეკავების მექანიზმებიც. დღეს ახალი გამოწვევების წინაშე ვართ და ეს წესრიგი მთლიანად მოიშალა. არც საერთაშორისო სამართლებრივი მექანიზმები არსებობს, რომლებიც უზრუნველყოფდა უსაფრთხოებას".

ბათუ ქუთელიას თქმით, რუსეთი, მასზე დამოკიდებული აქტორების მეშვეობით ცდილობს, რომ არსებული წესრიგი დაარღვიოს და ახალი წესრიგი შემოიტანოს, რომელიც გავლენის სფეროებზე იქნება დაფუძნებული:

"ზუსტად იგივე მეთოდით ტერორისტები იქცევიან. სწორედ ასეთ გამოწვევებს ეწოდებათ ჰიბრიდული გამოწვევები, სადაც კონვენციური, ბირთვული, ეკონომიკური საფრთხე და საინფორმაციო სივრცე ერთიანობაშია მოქცეული იმისთვის, რომ პოლიტიკური ინტერესები გატარდეს.

გეოგრაფიული საზღვრები დღეს აღარ არსებობს. ხშირად ვამბობ ხოლმე, რომ ვირტუალურ სივრცეში უკვე მიმდინარეობს მესამე მსოფლიო ომი. ფრონტის ხაზი კი თითოეული ადამიანის გონებაში გადის. რაც უფრო მეტად დაიპყრობს ადამიანის გონებას, მით უფრო გავლენიანი იქნება ის. ამას აკეთებენ ტერორისტები ამას აკეთებს რუსეთიც და ბუნებრივია, რომ საინფორმაციო ველს ამ საკითხში ძალიან დიდი მნიშვნელობა აქვს".

თავდაცვის სამინისტროს კიბერუსაფრთხოების ბიუროს ყოფილი ხელმძღვანელის, ანდრია გოცირიძის თქმით, კიბერუსაფრთხოების კუთხით, ერთადერთი რეალური საფრთხის შემცველი რუსეთია:

"იმისათვის, რომ სახელმწიფომ ადეკვატური რეაგირება მოახდინოს, გაცნობიერებული უნდა ჰქონდეს კიბერ საფრთხის შემცველი აქტორები. ეს კლასიკაა და ახალს ვერაფერს ვამბობ. ისევე როგორც მსოფლიოს სხვა ქვეყნებისთვისაც ჩვენთვისაც კიბერ საფრთხეების შემცველი აქტორები არიან მაღალ განვითარებული კიბერ პოტენციალის მქონე ქვეყნები. თუ ავიღებთ საფრთხის მნიშვნელობას ჩვენი ჩრდილო მეზობელი ერთადერთი აქტორია, რომელსაც აქვს იმის შესაძლებლობა რომ მასობრივი ზარალი და მსხვერპლი მოიტანოს. მხვედველობაში ის მაქვს, რომ რუსეთის შემტევ კიბერ პოტენციალში არსებობს შესაძლებლობა წვდომა მოიპოვოს ინფრასტრუქტურის მაკონტროლებელ სისტემებზე და განახორციელოს დარტყმა. გასაგები რომ იყოს, შემიძლია გავიხსენო უკრაინაში მომხდარი ფაქტი, როდესაც მთელი დასავლეთ უკრაინა ელექტროენერგიის გარეშე დარჩა - ადვილი წარმოსადგენია თუ რა საფრთხის შემცველი შეიძლება იყოს ის საქართველოსთვის".

ღონისძიება, რომლის ორგანიზატორის არასამთავრობო ორგანიზაცია ინტერნეტის განვითარების ინიციატივა იყო, საქართველოს დამამთავრებელი კლასის მოსწავლეებისა და უმაღლესი სასწავლებლის სტუდენტებისთვის გაიმართა.