პოლიციის თანხლებით მიმდინარეობს თავისუფალი კინოჩვენება მზიურში, რომელიც 8 საათზე დაიწყო. მის დაწყებამდე, მზიურთან თავი მოიყარეს ჰომოფობიური განწყობების მქონე პირებმა. მათი მიზანი კინოჩვენების ჩაშლა იყო. ადგილზე მყოფი On.ge-ს ჟურნალისტის თქმით, შეკრებილების მხრიდან ისმოდა შეურაცხმყოფელი შეძახილები.

ფილმი, სახელად პრაიდი, ჰომოფობიასთან, ტრანსფობიასთან და ბიფობიასთან ბრძოლის საერთაშორისო დღესთან დაკავშირებით შეირჩა და ის ტეტჩერის დროინდელ ბრიტანეთში, ლგბტ პირების მხრიდან სამოქალაქო აქტივიზმში ჩართულობის მნიშვნელობას ეხება.

მზიურის წარმომადგენლების ინფორმაციით, ადგილზე მობილიზებულია ვაკისა და მთაწმინდის საპატრულო პოლიცია.

აღნიშნული ფილმის პირველი საჯარო ჩვენება, 2015 წელს, თბილისის საერთაშორისო კინოფესტივალზე გაიმართა.